भांगरभूंय | प्रतिनिधी
पणजी: पॉवर ग्रीड कॉर्पोरेशन ऑफ इंडिया लिमिटेड हांणी उर्जा संवर्धन ह्या विशयाचेर आयोजीत केल्ले राज्य पांवड्यावेले चित्रकला सर्तींत कोंकणी भाशा मंडळ संचालीत रवींद्र केळेकार ज्ञानमंदिराच्या अर्णव नायक हाका पयलें इनाम फावो जालें.
आपल्या कलाकृतींतल्यान शाश्वत फुडारा खातीर उर्जा वाटावपाचें म्हत्व ह्या विशयाचेर अर्णव हांणी दिल्ल्या प्रभावी संदेशाची खासा तोखणाय जाली. अर्णव सातवेचो विद्यार्थी. ताका चित्रकलेची खाशेली आवड आसा. राज्य पांवड्यावेल्या सर्तींनी ताका जायतीं इनामां फावो जाल्यांत.
अर्णव आतां १३ डिसेंबराक नवी दिल्लीक राष्ट्रीय पांवड्यार गोंयचें प्रतिनिधित्व करतलो. शाळेच्या वेवस्थापन समितीचे अध्यक्ष भास्कर नायक आनी वेवस्थापक चेतन आचार्य हांणी अर्णव नायक हाका परबीं भेटयल्यां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
