भांगरभूंय | प्रतिनिधी
पणजी: ट्रायबल रिसर्च इन्स्टिट्यूट, गोंय हांणी आदिवासी कल्याण संचालनालयाच्या सहकार्यान ता. ११ जुलय २०२५ दिसा रविंद्र भवन मडगांवां राज्य पांवड्याचेर आदियुवा पथनाट्य सर्तीचें आयोजन केलां. ही कार्यावळ भगवान बिरसा मुंडा हांचे १५०वे जयंतीचो भाग म्हूण जन जातीय गौरव वर्सा निमतान आयोजीत केला.
केंद्रीय आदिवासी वेव्हार मंत्रालयान गोंय राज्या खातीर राष्ट्रीय पांवड्यार पथनाट्य उत्सव मंजूर केला आनी राष्ट्रीय पांवड्या वयल्या सर्ती पयलीं राज्य पांवड्याचेर आदियुवा पथनाट्य सर्तीचें आयोजन करपांत येता.
११ जुलय २०२५ दिसा रविंद्र भवन मडगांव हांगा सकाळीं १० वरां सावन आयोजीत करपी राज्य पांवड्या वयली आदियुवा पथनाट्य सर्त ही आंतर म्हाविद्यालयीन सर्त आसा.
राज्य पांवड्या वयल्या सर्तींत निवड जाल्ल्या पंगडाक ता. १९ आनी २० ऑगस्ट २०२५ दिसा जावपी राष्ट्रीय पांवड्या वयल्या आदियुवा पथनाट्य सर्तींत गोंय राज्याचें प्रतिनिधित्व करपाक मेळटलें.
राज्य आनी राष्ट्रीय पांवड्या वयली आदियुवा पथनाट्य सर्त रान हक्क कायदो, २००६, आदिवासी समाज-काल, आयज आनी फाल्यां, आदिवासी संस्कृती-सांबाळ आनी समर्पकताय आनी जन जातीय गौरव वर्ष अशां संकल्पनेचेर आयोजीत करतले. फकत हिंदी आनी इंग्लिश भाशेंतल्यान सादरीकरण करपाक मेळटलें. सर्तीच्या जैतिवंत पंगडांक चषक आनी आकर्शक इनामां भेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
