भांगरभूंय | प्रतिनिधी
पणजीः राज्य कर्मचारी आयोग स्थापनेक एक वर्स पुराय जाता. ह्या काळांत फक्त कांय थारायल्या पदां खातीर आयोगान भरती केल्या. सध्याच्या पयशे घेवन सरकारी नोकरी दिवपाचे भानगडी उपरांत हो आयोग परतून सक्रीय करप गरजेचें आसा. सरकारांतलीं सुमार 900 रित्यो सुवातो आयोगा वरवीं भरच्यो, अशी मागणी ‘आप’ पक्षाचे फुडारी रामराव वाघ हांणी केल्या.
नोकर भरतेंत पारदर्शकताय हाडपा खातीर हो आयोग स्थापन केल्लो. पूण सध्या भाजपा सरकारा भशेन हो आयोग निश्क्रीय जाला. कांय जाणांचे दलाल पयशे घेवन नोकरी दिवपाचें हांयस दाखयतात. हाका लागून नोकरी सोदपी बेरोजगार तरणाट्यांचो विस्वासघात जाला. तरणाट्यांक तांचे पात्रतायेचेर आदारून नोकरी मेळोवपाची यंत्रणा आसपाक जाय. शेनवारा पणजे घेतिल्ले पत्रकार परिशदेंत रामराव वाघ उलयताले. आमकां मेळिल्ले म्हायती प्रमाण, राज्यांतल्या वेगवेगळ्या 28 सरकारी खात्यांनी रित्या पदां विशीं आयोगाक म्हायती दिल्या. आयोगाची थापणूक जाली तेन्ना गोंयांत सुमार 1000 पदां रितीं आशिल्लीं. तातूंतल्यो शंबर सुवातो भरल्यात अशें मानल्यार लेगीत 900 सुवातो अजूनय रित्यो आसात. ह्या पदांचेर भरती कित्याक जायना? पयशे मेळोवपा खातीर हीं पदां भरिनात काय? हाका सरकारान जाप दिवची अशें वाघ हांणी सांगलें.
मुखेल सुत्रधाराक अटक करचीः रोहन नायक
नोकरी भानगड प्रकरणांत जायत्या जाणांक अटक केल्या. पूण व्हडल्या पदाचेर आशिल्ल्या मनशाचो हाका खर तेंको आसलें बगर अशो गजाली घडप शक्यूच ना. देखून ह्या प्रकरणां फाटल्यान आशिल्ल्या मुखेल सुत्रधाराक पुलिसांनी अटक करप गरजेचें आसा, अशें ‘आप’ फुडारी रोहन नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
