महाराष्ट्रांतलो सगळ्यांत व्हडलो काजू प्रकल्प
भांगरभूंय | प्रतिनिधी
नाशिक, खबरां संस्था : बागायती उत्पादनाची महाराष्ट्रांतली सह्याद्री फार्मर्स प्रोड्यूसर कंपनीन कोंकण आनी आदिवासी वाठारांत म्हत्वाचें पीक आशिल्ल्या काजवाची मोल सांखळ बांदपाचेर लक्ष केंद्रीत केलां. मोहाडींतल्या कंपनीच्या सह्याद्री फार्म्स कॅम्पसांत दिसाक 100 टन काजू प्रक्रिया कारखानो तांणी स्थापन केला. काजू उत्पादना वांगडाच काजूच्या कल्लांतल्यान तेल उत्पादन घेवपाकूय सुरवात केल्या. हाका लागून नाशिक जिल्ह्यांतल्या आदिवासी वाठारांतली अर्थवेवस्था वाडोवपाक मजत जातली.
कंपनीचे अध्यक्ष आनी वेवस्थापकीय संचालक विलास शिंदे हांणी सांगलें, काजू उत्पादनांत भारत संवसारांत मुखार आसलो तरी काजूची देशांतली मागणी आमी पुराय करूंक शकनात. ह्या शेतवडींत आनी वेपारांत खूब वाड जावपाची आसा. कोंकणा वांगडाच सह्याद्री पर्वतरांगेच्या घाटांतल्या हेर वाठारांनी काजूक लागून अर्थीक क्रांती घडोवपाची संद आसा.
दुसरे वटेन काजूची सरासरी उत्पादकताय वाडोवपा वांगडाच काजू गर आनी काजूच्या उत्पादनांचे व्हड प्रकल्प स्थापन करपाचेर लक्ष केंद्रीत करप गरजेचें आसा. हाका लागून काजू शेतकारांची येणावळ वाडटलीच, तेच बरोबर गांवांनी रोजगाराची संद निर्माण जातली.
सह्याद्रीचो काजू प्रक्रिया प्रकल्प
- दर दिसा 100 टन काजू बियो हाताळपाची तांक
- देशांतल्या पयल्या 10 प्रकल्पां मदीं आनी राज्यांतलो सगळ्यांत व्हडलो प्रकल्प
- सगळ्यो प्रक्रिया प्रणाली एकाच सुवातेर
- काजूच्या कवचांतल्यान 20 टन क्षमताय आशिल्लो तेल काडपाचो कारखानो
- उत्पादन गुणवत्तेच्या बीआरसी उच्च मानकां समतुल्य वेवस्थापन
- वाठारांतल्या 300 परस चड बायलांक कायम रोजगार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
