भांगरभूंय | प्रतिनिधी
पणजी: गोंय विधानसभेच्या अर्थसंकल्पीय अधिवेशनांत राज्याच्या वाडपी रिणां वेल्यान सत्ताधारी आनी विरोधकां मदीं तोंडाक तोंड जालें. राज्याची रिणाची टक्केवारी कोविड काळांत १६.५० टक्क्यां वेल्यान आतां २०२५-२६ वर्सा ३.९९ टक्क्यां मेरेन देंवल्या. सरकार फकत भांडवल खर्चा खातीरूच रीण घेतिल्ल्याचें मुख्यमंत्री डॉ. प्रमोद सावंत हांणी सभाघरांत स्पश्ट केलें. केंद्र सरकारच्या विशेश सहाय्य येवजण्या खाला ५० वर्सांच्या व्याजमुक्त मुदतीचेर येवपी अर्थीक वर्सा ४,५०० ते ५,००० कोटी रुपयांचें रीण घेवपाचें सरकाराचें नियोजन आशिल्ल्याचेंय तांणी ह्या वेळार नमूद केलें.
राज्याचे अर्थीक भलायके विशीं चिंता उक्तावपी विरोधकांक जाप दितना मुख्यमंत्र्यांनी सांगलें, सध्याच्या वर्सा सरकारान ४,१४८ कोटी रुपया भांडवली खर्चा खातीर वापरल्यात. उक्त्या बाजारांतल्यान ४,५०० कोटींच्या मर्यादे मदलें फकत १,२५० कोटींचें रीण घेतलां, फुडल्या वर्सा ही रक्कम १,००० कोटीं मेरेन मर्यादीत दवरपाचो सरकाराचो यत्न आसा. नीती आयोगाच्या मुल्यमापना प्रमाण वित्तीय वेवस्थापनांत गोंय तिसर्या नंबराचेर आशिल्ल्यान राज्याचें रीण आनी ’जीएसडीपी’ गुणोत्तर ३० टक्क्यां वेल्यान २७ टक्क्यांमेरेन देंवोवपाक येस आयलां. जें बेगीनूच २५ टक्क्यां मेरेन उणें करतले, असो विस्वास तांणी उक्तायलो.
दुसरे कडेन, विरोधी पक्षांच्या फुडार्यांनी राज्याच्या वाडपी वट्ट रिणां विशीं खर प्रस्न उक्तायलो. आम आदमी पक्षाचे आमदार वेंझी व्हिएगस हांणी फाटल्या णव वर्सांनी वट्ट रीण १६,००० कोटीं वेल्यान ३५,००० कोटी रुपयां मेरेन पाविल्ल्याचें सांगून चिंता उक्तायली. अंदूं सरकाराक रीण भरपा खातीर सुमार ३,६०० कोटी रुपया खर्च करचे पडटले आनी २०३०-३१ मेरेन ही रक्कम वर्सुकी ४,३०० कोटींचेर पावतली, हाचे कडेनूय तांणी सगल्यांचें लक्ष ओडलें.
विरोधी पक्ष फुडारी युरी आलेमाव हांणी सरकारी कार्यावळींचेर जावपी बर्याच खर्चा वेल्यान सरकाराक धारेर धरलें. २०२२ सावन सरकारान विवीध इव्हेंट्संचेर ६७७ कोटी रुपया खर्च केल्यात. दिसाक सरासरी ४७ लाख रुपया खर्च जाता असो दावो तांणी केलो. प्रधानमंत्री हाजीर आशिल्ल्या ’विकसीत गोंय, विकसीत भारत’ ह्या ६० मिनटांचे कार्यावळीचेर १३ कोटी रुपया म्हळ्यारूच प्रती मिनीट २२ लाख रुपया खर्च केल्ल्याचो आरोप करीत तांणी खर्चाचे पारदर्शकतेचेर प्रस्न केलो. हे टिकेक जाप दितना मुख्यमंत्र्यांनी ठामपणान सांगलें, रिणाची रक्कम फकत भांडवल उदरगती खातीर वापरतात, कार्यावळींच्या आयोजना खातीर न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
