भांगरभूंय | प्रतिनिधी
पणजी : फाटल्या वर्साचे तुळेंत राज्याच्या फेब्रुवारी म्हयन्याच्या जीएसटी संकलनांत ७ टक्क्यांनी वाड जाल्या. अंदूं फेब्रुवारी म्हयन्यांत जीएसटी वरवीं वट्ट ४३० कोटी रुपया महसूल एकठांय केला. फाटल्या वर्साच्या फेब्रुवारी म्हयन्यांत जीएसटी संकलन ४०३ कोटी रुपया आशिल्लें. केंद्रीय अर्थ खात्यान हालींच ही म्हायती जारी केली.
अर्थीक वर्स २०२५-२६त (फेब्रुवारीचे निमाणे कडेन) केंद्र सरकारान इंटिग्रेटेड जीएसटी (आयजीएसटी)तल्यान गोंयांक दुसर्या टप्प्यांतलो ४ हजार १७८ कोटी रुपयांचो वांटो दिला. फाटल्या वर्सा हो वाटा ४ हजार १३६ कोटी रुपया आशिल्लो. जाल्यार पयल्या टप्प्यांत गोंयांक २०२४-२५ वर्सा २ हजार ३८१ कोटी, जाल्यार २०२५-२६ वर्सा २ हजार ४३४ कोटी रुपयांचो वाटो दिल्लो.
एप्रील २०२५ ते फेब्रुवारी २०२६त जीएसटी वरवीं केंद्रान गोंयच्यान २ हजार ५४३ कोटी जाल्यार राज्यान ३ हजार ८२५ कोटी रुपया संकलन केलां. वयल्या काळांत जीएसटी सयत हेर स्वरूपांतल्यान वट्ट ६ हजार ३६९ कोटी रुपया जमा जाल्यात. फाटल्या वर्साच्या एप्रील ते फेब्रुवारीचे तुळेंत अंदूं राज्यांतलें जीएसटी संकलान देंवून ०.९ टक्के आशिल्ल्याचें केंद्रीय अहवालात नमूद केलां.
पुराय देशाचो विचार केल्यार फेब्रुवारी म्हयन्यांत जीएसटी संकलन १ लाख ६१ हजार कोटी रुपयां वयर गेलां. देशाचें जीएसटी संकलन फाटल्या वर्साच्या फेब्रुवारी म्हयन्या परस ७.९ टक्क्यांनी चड आसा. फेब्रुवारी म्हयन्यांत महाराष्ट्रांतल्यान सगल्यांत चड १६ हजार ५८१ कोटी जीएसटी संकलन जालें. जाल्यार मिझोरमच्यान सगल्यांत उणें ८० कोटी रुपया जीएसटी संकलन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
