भांगरभूंय | प्रतिनिधी
दामू नायक : दरेका मतदारसंघांत उदरगती खातीर 100 कोटी
भांगरभूंय । प्रतिनिधी
पणजी : मुख्यमंत्री डॉ. प्रमोद सावंत हांणी शुक्रारा सादर केल्लो 30 हजार कोटी रुपयांचो अर्थसंकल्प हो सामान्य लोकांक दोळ्यां मुखार दवरून केला. अर्थसंकल्पांत उदरगती सयत लोकाभिमुख कामां करचे खातीर तजविजो केल्यात. भाजपाच्याडबल इंजीन सरकाराची लोकां विशीं आशिल्लीं बांदिलकी स्पश्ट जाता, अशें मत प्रदेशाध्यक्ष दामू नायक हांणी उक्तायलें. शेनवारा पणजे घेतिल्ले पत्रकार परिशदेंत ते उलयताले. ह्या वेळार आमदार दाजी साळकार हाजीर आशिल्ले.
दामू नायक हांणी सांगलें, अर्थसंकल्पा वरवीं पोरण्यो येवजण्यो अदीक घटमूट करून नव्यो येवजण्यो हाडल्यात. मुळाव्या सुविधांची उदरगत करचे खातीर 4 हजार कोटी रुपयांची तजवीज केल्या. भेदभाव करिनासतना दरेका मतदारसंघांत 100 कोटी रुपयांचीं उदरगतीचीं कामां करपाक तजवीज केल्या. सामान्य लोकां खातीर म्हत्वाच्यो आशिल्ल्यो डीएसएसआर, गृह आधार येवजण्यांतलो निधी वाडोवचे खातीर अर्थसंकल्पीय तजवीज केल्या. अर्थसंकल्पांत कंत्राटी कर्मचाऱ्यांच्यो समस्या सोडोवचे खातीर व्हड पावल उखल्लां.
10 वर्सां कंत्राटाचेर आशिल्ल्या कर्मचाऱ्यांक कायम करतले. एसटी समाजाची उदरगत करचे खातीर तयार केल्ल्या कुशावती जिल्ह्या खातीर 500 कोटी रुपयांची तजवीज केल्या. हे वरवीं थंयच्यो मुळाव्यो सुविधा निर्माण करतले. डिजिटल टॅक्सी धोरणाक लागून खूब वर्सां पडून आशिल्लो टॅक्सी प्रस्न सुटावो जातलो. हाचे वरवीं थळाव्या टॅक्सी चालकांचो फायदोच जातलो. वाडटे म्हारगायेचो विचार करून दीनदयाळ स्वास्थ सेवा येवजणेचो निधी वाडोवपाची चजवीज अर्थसंकल्पांत केल्या. अर्थसंकल्पांत नारीशक्ती खातीर भरीव तजवीड केल्या. ते प्रमाण आयटीआयंत प्रवेश घेवपी बायलांक ट्युशन फी माफ केल्या. ते भायर दरेका जिल्ह्यांत महिला वसतीघर बांदपा खातीर 100 कोटी रुपयांची तजवीज केल्या. एसटी भावां खातीर आशिल्ल्या अटक आसरा येवजणेचो निधी 1.5 लाख रुपया वयल्यान 3 लाख रुपया केला. हे विशीं आमकां खूब जाणांनी सकारात्मक प्रतिसाद दिला. म्हजो फ्लॅट येवजणेक लागून जमीन सोसायटीच्या नांवान करप सोंपें जातलें. लोकाभिमुख अर्थसंकल्प सादर केल्ले खातीर आमी पक्षा वतीन मुख्यमंत्री डॉ. प्रमोद सावंत हांकां परबीं दितां, अशें दामू नायक हांणी सांगलें.
स्वयंपूर्ण गोंया खातीर फायद्याचो : साळकार
अर्थसंकल्पांत मुळाव्या सुविधां सयत मानवी उदरगतीचेर भर दिला. अर्थसंकल्पाक लागून पर्यटन, दळणवळण, भलायकी, शिक्षण, उद्देग मळाक फायदो जातलो. स्वयंपूर्ण गोंयचे उद्दिश्ट साध्य करचे खातीर हो अर्थसंकल्प फायद्याचो थारतलो, अशें दाजी साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
