भांगरभूंय | प्रतिनिधी
रवी नायक: फोंडेंच्या क्राती मैदानाचेर हुबयलो राष्ट्रीय तिरंगो
राज्य सरकार दरेका मळार मागीर तें शिक्षण, भलायकी, साधनसुविधा आनी हेर खंयच्याय मळांचेर जांव उदरगतीचें काम करता. प्रधानमंत्री नरेंद्र मोदी हांच्या फुडारपणाखाला, केंद्र सरकाराच्या सहकार्यान राज्यांत मोपा आंतरराष्ट्रीय विमानतळ, नवो जुवारी पूल आनी हेर प्रकल्पांची कामां चालू आशिल्ल्यान हालींच मोपा आंतरराष्ट्रीय विमानतळाच्या पयल्या टप्प्याच्या कामाचें उक्तावण जालां.
– शेतकी मंत्री रवी नायक
फोंडें: समाजांतल्या निमाण्या मनशा मेरेन कल्याणकारी येवजण्यो आनी साधनसुविधायो पावोवन राज्याची पुरायेन उदरगत करपाक सरकार कटीबद्द आसा, अशें शेतकी मंत्री रवी नायक हांणी फोंडेंच्या क्राती मैदानाचेर आयोजीत गोंय मुक्ती दीस सुवाळ्यांत राष्ट्रीय तिरंगो हुबयल्या उपरांत सांगलें.
सुरवातेक नायक हांणी क्राती मैदानावयल्या हुतात्मा स्मारकाचेर फुलांचें चक्र ओंपून गोंय मुक्ती चळवळींतले सुटके झुजारी आनी हुतात्म्यांक आर्गां ओपलीं.
फुडें उलयतना मंत्री नायक हांणी, गोंय मुक्ती खातीर सुटके झुजार्यांनी केल्ल्या त्यागाचो उगडास करचो. तांच्या त्यागाक लागून आयज आमी आमची आनी राज्याची उदरगत करपाक शकले, अशें तांणी सांगलें.
सुवाळ्याक अतिरिक्त जिल्होधिकारी विशाल कुंडयकार, उपजिल्होधिकारी सिताराम सांवळ, पुलीस उपअधीक्षक आशिष शिरोडकार, एनआरआय आयुक्त नरेंद्र सावयकार, स्वातंत्र्य सैनीक, नगरसेवक, जिल्हो पंचायत वांगडी आनी विद्यार्थी हाजीर आशिल्ले.
मंत्री रवी नायक हांकां उपजिल्हाधिकारी सिताराम सांवळ, पुलीस उपअधीक्षक आशिष शिरोडकार, एनआरआय आयुक्त नरेंद्र सावयकार हांणी येवकार दिलो.
ह्या वेळार वेगवेगळ्या शाळांच्या विद्यार्थ्यांनी देशभक्ती गीतां सादर केलीं.
गिरीष वेळगेकार हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
