भांगरभूंय | प्रतिनिधी
बार्देश म्हालांत सगळ्यांत चड दिव्यांग विद्यार्थी
पणजीः आयकुपाक येना, दिसना अशा दिव्यांग भुरग्यांक शिक्षण दिवपाचे सरकाराचे यत्न चालूच आसात. ह्या यत्नांक व्हड प्रमाणांत येसूय मेळटा. सांगें सोडल्यार दरेका म्हालांतली दिव्यांग भुरगीं शाळां/ विद्यालयांनी शिक्षण घेतात. बार्देश म्हालांत सगळ्यांत चड 662 दिव्यांग विद्यार्थ्यांची नोंद जाल्या. ही म्हायती अर्थीक सर्वेक्षणाच्या अहवालांत दिल्या. राज्यांत दिव्यांग विद्यार्थ्यांचो आंकडो 2,708 आसा.
अर्थसंकल्पीय अधिवेशनाच्या निमाण्या दिसा मुख्यमंत्री डॉ. प्रमोद सावंत हांणी 2023- 2024 वर्साचो अर्थीक सर्वेक्षण अहवाल सादर केलो. तातूंत 2023- 2024 शिक्षणीक वर्सा खातीर दिव्यांग विद्यार्थ्यांची आंकडेवारी दिल्या. सांगें सोडल्यार हेर सगळ्या म्हालांनी दिव्यांग विद्यार्थ्यांची नोंद आसा. पेडणें 74, बार्देश 662, दिवचले 177, सत्तरी 104, तिसवाडी 404 आनी फोंडें 352 दिव्यांग विद्यार्थी आसात.
दक्षीण गोंयचो विचार केल्यार धारबांदोड्यां 23, केपें 335, काणकोणां 70, साश्टी 288 दिव्यांग विद्यार्थ्यांची नोंद जाल्या. 2023-2024 वर्सा राज्यांत 2,708 विद्यार्थ्यांची नोंद जाल्ली. ताचे आदीं 2022-23 वर्सा 2,769 दिव्यांग विद्यार्थ्यांची नोंदणी जाल्ली. हाचो अर्थ दिव्यांग विद्यार्थ्यांचो आंकडो उणो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
