राज्यांत २०३५ मेरेन कोयरांत २५% वाड जावपाची शक्यताय
भांगरभूंय | प्रतिनिधी
पणजीः फुडल्या १० वर्सांनी गोंयच्या कोयरांत २५ टक्के इतली वाड जावपाची आसा. राज्याच्या घन कोयर वेवस्थापन धोरणांतल्यान जारी केल्ले आकडेवारी प्रमाण २०३५ मेरेन गोंय राज्य दर दिसा १,१०० टनां परस चड कोयर निर्माण करपाच्या मार्गार आसा. सगल्यात व्हडले कोयराचे संकश्ट हें बार्देस म्हालांत जावपाची शक्यताय आसा.
घन कोयर वेवस्थापन म्हामंडळान तयार केल्ल्या धोरणा भितर कोयराचे प्रमाणीकरण आनी लक्षणीकरण अहवाला जारी केलां. अहवालांत दिल्ले आंकडेवारी प्रमाण २०२५सात दर दिसा ८८७.६१ टीपीडी कोयर एकठांय जातालो. आतां फुडाराक २०३० वर्सा कोयर एकठांय जावपाची आंकडेवारी ९९२.६७ टीपीडी मेरेन पावपाची शक्यता आसा, जाल्यार २०३५ मेरेन १,१०७.८० टीपीडी इतलो कोयर एकटाय जावपाची शक्यता आसा. येवपी धा वर्सां मदीं राज्यभरांतल्या कोयरांत दर दिसा २२० टनांची वाड जावपाचो अदमास आसा.
ह्या अहवालांत ‘बार्देस’ हो म्हाल कोयराच्या समस्येचे मुखेल केंद्र म्हूण वयर आयला. बार्देसांत कोयराचें प्रमाण सगळ्यांत चड आसा आनी २०२५ वर्सांत २२७.४० टीपीडी कोयरा वयल्यान २०३५ वर्सा मेरेन हो कोयर २८४.८२ टीपीडी मेरेन पावतलो.
पर्यटन आनी शारीकरण ह्या घटकांक लागून हे वाडीचो अदमास काडला. २०३५ मेरेन फक्त कळंगुटेचे दर्यादेगेर दर दिसा ५४.५७ टीपीडी कोयर निर्माण जातलो, जें म्हापशें सारकिल्ल्या पालिका वाठाराच्या ५६.७२ टीपीडी कोयराच्या प्रमाणा इतलें आसा.
राजधानी पणजींत २०३५ मेरेन ५७.२३ टीपीडी इतलो कोयर निर्माण जातलो. जाल्यार फोंडें आनी सत्तरी म्हालांनी येत्या १० वर्सांनी कोयरांत २६ टक्के वाड जावपाचो अदमास आसा.
पर्यटन आनी शारीकरणाक लागून बार्देस आनी साश्ट हे म्हाल कोयर निर्मितींत मुखार आसात. धारबांदोडा म्हालांत कोयराचें प्रमाण सगळ्यांत उणें आसा, पूण वाडीची टक्केवारी २८.४ टक्के हेर म्हालाच्या तुळेंत चड आसा. म्हापशें, पणजी आनी मडगांव सारक्या शारांत कोयराचो ताण २०३५ मेरेन खुबच वाडपाची शक्यताय आसा.
गोंयच्या म्हालां प्रमाण कोयर निर्मिती अदमास
(आकडेवारी: टन दर दिसा – टीपीडी)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
