भांगरभूंय | प्रतिनिधी
पणजीः गोंयांतली वाचन संस्कृताय घटमूट करपा खातीर आनी गांवगिर्या वाठारांतल्या वाचप्यांक हक्काची माची दिवपा खातीर मुख्यमंत्री डॉ. प्रमोद सावंत हांणी राज्यांत १६८ नवीं वाचनालयां स्थापन करपाची म्हत्वाची घोशणा केली. राज्यांतल्या सगळ्या ग्रामपंचायतींनी आनी नगरपालिका वाठारांनी हीं वाचनालयां उबारतले. आतां मेरेन ह्या महत्वाकांक्षी उपक्रमांतल्यान २० ग्रंथालयां कार्यान्वीत जाल्यांत. तळागाळांतल्या नागरिकां मदीं वाचनाचो मोग निर्माण करप आनी गिन्यानाचीं दारां उक्तीं करप हो हाचे फाटलो मुखेल हेत अशें मुख्यमंत्र्यानी सांगलें.
फोंडें नगरपालिकेच्या ई लायब्ररीचें उक्तावण मुख्यमंत्र्यां हस्तुकीं जालें. ह्या वेळार ते मुखेल सोयरे ह्या नात्यान उलयताले.
ह्या प्रकल्पा खातीर थळाव्या स्वराज्य संस्थांक फुडाकार घेवपाचो उलो मारलो. आमचे कडेन भागांतल्या वाचनालयांची उदरगत आनी तांचो योग्य सांबाळ करपाची जापसालदारी ह्या संस्थां कडेन दिल्या. थळाव्या पांवड्यार वाचनालयांचें जाळें विणल्यार तरणाट्यां पसून जाण्ट्यां मेरेन सगल्यांकूच हाचो लाव जातलो, असो विस्वास उक्तायलो. फकत पुस्तकां उपलब्ध करून दिवप इतल्याचेरूच मर्यादीत उरनासतना, एक समृद्ध वाचन संस्कृती तिगोवन दवरपा खातीर हें एक व्हड पावल मानतात.
भौतीक वाचनालयां वांगडाच गोंयांक डिजिटल क्रांती कडेन जोडपा खातीर मुख्यमंत्र्यांनी ’ई-लायब्ररी’ प्रकल्पाचीय घोशणा केल्या. केंद्र सरकाराच्या विशेश अनुदानांतल्यान हो प्रकल्प पुराय राज्यभर राबयतले. ह्या डिजिटल ग्रंथालयाक लागून राज्यांतल्या विद्यार्थ्यांक आनी वाचकांक दुर्मीळ पुस्तकां तशेंच शिक्षणीक संसाधनां एका क्लिकार उपलब्ध जातलीं. ऑनलायन माध्यमांतल्यान शिक्षणाच्यो संदी विस्तारपा खातीर हो उपक्रम सामको फायद्याचो थारतलो.
शार आनी गांवगिर्या अश्या दोनूय वाठारांनी दर्जेदार ग्रंथालय सेवा पावपा खातीर शासन कटिबद्ध आसा. डिजिटल आनी प्रत्यक्ष ग्रंथालयांच्या संगमातल्यान गोंयचो शिक्षणीक दर्जो वयर सरपाक मजत जातली, अशें मुख्यमंत्र्यांनी ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
