भांगरभूंय | प्रतिनिधी
पणजी : अरबी दर्यांत तयार जाल्ल्या उण्या दाबाचो पट्टो आनी बंगालच्या उपसागरांतल्या वातावरणाच्या बदलाक लागून शुक्रारा राज्यांत सेगीत पावस झडलो. उण्या दाबाचो पट्टो पणजीच्या नैऋत्य दिकेक अरबी दर्यांत 430 किमी अंतरार आसा. हवामान खात्यान 25 आनी 26 ऑक्टोबराक वादळी वार्या सयत पावसाची शक्यताय उक्तायल्या. हे प्रमाण ह्या दोन दिसां खातीर पावसाचो येलो अलर्ट जारी केला. राज्यांत 27 ते 30 ऑक्टोबर मजगतीं पावसाची शक्यताय उक्तायल्या.
शुक्रारा पणजे सयत हेर वाठारांनी दनपरां उपरांत सेगीत पावस चालूच आशिल्लो. सेगीत पडिल्ल्या पावसाक लागून कांय सुवातांचेर झाडां पडून ल्हान लुकसाणेच्यो घडणुको घडल्यो. राज्यांत 25 ते 28 ऑक्टोबर मजगतीं वार्याचो वेग वराक 35 ते 55 किमी मेरेन पावपाची शक्यताय आशिल्ल्यान नुस्तेंमार्यांनी दर्यांत देवचें न्हय असो उलो हवामान खात्यान मारलो.
राज्यांत चोवीस वरांनी 8.5 मिलिमीटर पावसाची नोंद जाली. मजगतीं धारबांदोड्यां 16.4 मिमी पावस पडलो. राज्यांत 1 ते 24 ऑक्टोबर मजगतीं सरासरी 4.30 इंच पावसाची नोंद जाली. ह्या काळांत पेडण्यां 8.43 इंच, धारबांदोड्यां 5.78 इंच, सांखळे 5.15 इंच, जाल्यार पणजे 5.14 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
