भांगरभूंय | प्रतिनिधी
पणजी : सप्टेंबर म्हयन्यांत राज्यांतल्या चडश्या वाठारांनी सरासरी परस चड पावसाची शक्यताय आसा. जाल्यार कांय वाठारांनी सरासरी इतल्या पावसाची शक्यताय आसा. हवामान खात्यान हे विशींचो अदमास जारी केला. सप्टेंबरांत राज्यांतल चडांत चड तापमान सरासरी इतलो, जाल्यार उण्यात उणो तापमान सरासरी परस चड उरपाची शक्यताय आसा. खात्यान बुधवार ३ सप्टेंबराक राज्यांत घोग्यांनी पावसाची शक्यताय उक्तायल्या. तशेंच ऑरेंज अलर्ट जारी केला.
१ जून ते १ सप्टेंबर ह्या काळांत राज्यांत सरासरी ११३.७८ इंच पावस पडला. फाटल्या वर्सा ह्याच काळांत सरासरी १५५ इंच पावस पडिल्लो. अंदूं राज्यांत पावस २५ मेक पावलो. हवामान खातें १ जून ते ३० सप्टेंबर हो पावस घेतात. ह्या काळांत राज्यांत सरासरी ११३ इंच पावस पडला. अंदूं ऑगस्टाच्या निमाणें मेरेन सरासरी हंगामी पावस पुराय जाला.
राज्यांत २४ वरांत सरासरी १३ मिलिमीटर पावस पडलो. खात्यान २ ते ४ सप्टेंबर ह्या काळांत मध्यम पावस पडपाचो अदमास काडला. ते प्रमाण ह्या चार दिसां खातीर येलो अलर्ट जारी केला. पावसाक लागून राज्यांत चडांत चड तापमान वाडलां. सोमारा चडांत चड तापमान ३०.२ अंश आनी उण्यांत उणें २४.५ अंश नोंद जालां.
सांग्यार पावसाचो देड शेंकडो पुराय
राज्यांत १ जून ते १ सप्टेंबर मजगतीं सांग्यार १५०.९९ इंच, धारबांदोड्यां १४९.८० इंच, वाळपय १४३.६७ इंच, केप्यां १३९.१५ इंच,
फोंड्यां १२१.९८ इंच, सांखळे ११६.७२ इंच,
काणकोणा १०८.०३ इंच, पोरणें गोंयां १०७.६३ इंच,जाल्यार पेडण्यां १०९.९१ इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
