भांगरभूंय | प्रतिनिधी
पणजी : राज्यांत रेंट अ बायक आनी रेंट अ कार सेवेक लागून अपघात वाडल्यात, टॅक्सी चालकांच्या वेवसायाचेरूय हाचो वायट परिणाम जाला. ह्यो सेवा बंद केल्यार थळाव्या टॅक्सी चालकांक फायदो जातलो, अशें येणावळ मंत्री बाबुश मोन्सेरात हांणी म्हणलां.
सोमारा पणजी, ताळगांवां आनी सांता क्रूझच्या टॅक्सी चालकांनी मंत्री मोन्सेरात हांची भेट घेवन अॅप आधारीत टॅक्सी सेवा बंद करपाची मागणी केली. ह्या वेळार टॅक्सी संघटनांचे योगेश गोवेकार, रौनक अली आनी हेर हजर आशिल्ले.
पाटो वाठारांत पार्किंगाची ९० टक्के सुवात रेंट वाहनांनी घेतल्या. येरादारी विभागान ते खातीर स्वतंत्र सुवात सोदपाक जाय आशिल्ली, मात ती वेवस्था आजूनय ना. हाका लागून हें खातें अपेशी थारलां. येरादारी खात्याच्या संचालकांनी ह्या गजालींची काळजी घेवपाक जाय, अशें मोन्सेरात हांणी म्हणलें. सरकारान टॅक्सी वेवसायांत सुटसुटीतपणां हाडपा खातीर ऍप अग्रिगेटराचें धोरण हाडलें. हें धोरण थळावे टॅक्सी चालकांच्या आड ना. हे विशीं सुचवण्यो, मतां दिवपा खातीर एका म्हयन्याचो काळ दिला. सरकार टॅक्सी धनयांची बाजू आयकून फुडलो निर्णय घेतले. कांय टॅक्सी चालकांचे चुकीचे वागणुकेक लागून पर्यटकांक त्रास जाता हेंय मान्य करपाक जाय अशें तांणी म्हणलें.
रेंट अ बायक, गाडयांक लागून जावपी समस्यां विशीं हांवें कॅबिनेटांत चर्चा केल्ली. तेन्ना हांवें ह्यो दोनूय सेवा कायमच्यो बंद करपाची मागणी केली. उपरांत येरादारी खात्यान नवे परवाने दिवप बंद केल्ले. कांय रेंट वाहन चालकां कडेन एक टॅक्सी, १५ गाडयो आनी ५० दुचाकी आसात, हाका लागून ते भरपूर फायदो जोडटात, मात जांचो पुराय वेवसाय टॅक्सीचेर आसा, तांचेर अन्याय जाता, अशेंय मोन्सेरात हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
