भांगरभूंय | प्रतिनिधी
पणजी: एके वटेन हवामान विभागान फुडल्या दोन दिसां सावन मॉन्सून देशांतल्यान वतलो अशी शक्यताय उक्तायल्या. जाल्यार दुसरे वटेन दनपरां खर वत पडिल्ल्याचें दिसून आयलें. मंगळार सावन फुडले तीन दीस राज्यांत पावसाचो अदमास उक्तावन हवामान खात्यान येलो अलर्टूय जारी केलो. गोंयांत १ जून ते १५ ऑक्टोबर मेरेन सुमार १७९ इंच पावसाची नोंद जाल्या. मान्सून काळांत १७३.२५, जाल्यार मान्सूना उपरांत आतां मेरेन ५.९४ इंच पावसाची नोंद केल्या.
भारताच्या उत्तर आनी ईशान्य वाठारांतल्यान पावस परतला. मॉन्सून गुजरात, मध्य प्रदेश, छत्तीसगड, ओडिशा राज्यांच्या चडश्या भागांतल्यान मॉन्सून परतला. फुडले दोन दीस मॉन्सून गुजरात, मध्य प्रदेश, छत्तीसगड आनी ओडिशाच्या उरिल्ल्या वाठारांतल्यान आनी महाराष्ट्राच्या आनीक कांय वाठारांतल्या परततलो. तशेंच मॉन्सून देशांतल्यान फुडल्या दोन दिसांनी परततलो असो अदमास हवामान खात्यान उक्तायला.
गोंयां सयत लागसारचे कोकणांतले सगळे जिल्हे आनी महाराष्ट्रांतले कोल्हापूर, सातारा, सोलापूर, पुणे जाल्यार मराठवाड्यांतले धाराशिव, लातूर, नांदेड, परभणी आनी हिंगोली जिल्ह्यांत कांय सुवातांचेर जोगलां सयत हलक्या ते मध्यम पावसाचो अदमास उक्तायला.
मजगतीं, पावसाक लागून शेतकारांची भातकापणी आडकून पडली. ताका लागून शेतकारां मदीं चिंतेचें वातावरण आसा. पावस केन्ना थारतलो आनी भातपिकाची कापणी केन्ना करतले असो प्रस्न शेतकारांक पडला. सोमारच्यान राज्यांत दमट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
