भांगरभूंय | प्रतिनिधी
पणजी : राज्य सरकारान अकुशल मनरेगा कामगारांची दिसाची मजुरी २२ रुपयांनी वाडोवपाचो निर्णय घेतला. ह्यान पयलीं गोंयांत मनरेगा कामगारांक दिसाक ३५६ रुपया मजुरी मेळटाली. हातूंत २२ रुपयांची वाड करून ती दिसाक ३७८ रुपया केल्या. हे विशीं गांवगिर्या विकास खात्याचे प्रकल्प संचालक प्रेमराज शिरोडकार हांणी हालींच अधिसुचवणी जारी केल्या.
अधिसुचवणेंत म्हणलां, केंद्रीय ग्रामीण विकास खात्यान मार्च २०२५ वर्सा देशांतल्या विवीध राज्यां खातीर मनरेगा येवजणे खाला मजुरीचें नवें दर अधिसुचीत केल्लें. हे प्रमाण अर्थीक वर्स २०२५-२६ खातीर गोंयांत अकुशल मनरेगा कामगारांक दिसाची मजुरी वाडोवन ३७८ रुपया करपाचो निर्णय जाल्लो. हे प्रमाणूच गोंयच्या ग्रामीण विकास खात्यान मजुरीचें नवें दर १ एप्रिल २०२५ सावन लागू करपाचो निर्णय घेतला.
केंद्रीय ग्रामीण विकास खात्या वतीन नवें अर्थीक वर्स सुरू जावचे पयलीं मनरेगा येवजणे खाला मजुरीचें नवें दर जाहीर करतात. केंद्रान २७ मार्च २०२५ वर्सा नवें दर जाहीर केल्लें. फाटल्या वर्साचे तुळेंत राज्या प्रमाण मजुरी दरांत ५ ते ८ टक्क्यांची वाड केल्ली. चालू अर्थीक वर्सा खातीर हरियाणाक सगल्यांत चड ४०० रुपया प्रतीदीन दर थारायला. जाल्यार अरुणाचल प्रदेशांत सगल्यांत उणे २४१ रुपया प्रती दीस मजुरी दर थारायिल्लें.
मजुरी दरांत गोंय दुसरे सुवातेर
सगल्यांत चड मजुरी दर दिवपांत हरियाणा उपरांत (४०० रू.) गोंयचो (३७८ रू.) क्रमांक लागता. उपरांत कर्नाटक (३७० रू.), केरळ (३६९ रू.), पंजाब (३४६ रू.), तामिळनाडू (३३६ रू.), ह्या राज्यांचो क्रमांक लागता. केंद्र शासीत प्रदेशांत निकोबारांत सगल्यांत चड ३६१ रुपया मजुरी दर थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
