भांगरभूंय | प्रतिनिधी
भांगरभूंय । प्रतिनिधी
पणजीः फाटल्या चार वर्सांत रस्तार भीक मागपी 75 ल्हान भुरग्यांची सुटका केल्या आनी तांका अपना घरांत धाडल्यांत. कांय जाणांक दुसरे राज्यांत तांचे मुळ गावांत धाडून तांचे कुटुंबाच्या ताब्यांत दिल्यात. 2024त सगळ्यांत चड 40 भुरग्यांची सोडवणूक केल्या, अशी म्हायती बायल आनी भुरगीं उदरगत खात्यान दिल्या.
विधानसभेच्या पटलार लेखी जाप दितना बायल आनी भुरगीं उदरगत मंत्री विश्वजीत राणे हांणी ही म्हायती दिली.
राज्यांतल्या विंगड विंगड भीक मागपाचे सुवातेर उत्तर आनी दक्षीण गोंयच्या जिल्लो भुरगी संरक्षण युनीटान भुरगीं कल्याण समिती, भुरगीं हक्काचे संरक्षणा खातीर गोंय राज्य आयोग आनी पुलिसांच्या मजतीन खुबशे जोड मोहीम हातांत घेतल्या. भुरगीं हॅल्पनायन ही सरकारांत विलीन करून हे 24 वरां हेल्पलायनीचेर भुरगीं भिक मागपाची प्रकरणां नोंद जाता आनी कर्मचारी रोखडीच ताची दखल घेता.
भुरग्यांची सोडवणूक जाले उपरांत तांची भलयाकी आनी सुरक्षा निश्चित करपा खातीर भुरग्यांची जिल्लो इस्पितळात वैजकी चांचणी जाता. भुरगीं कल्याण समितीच्या आदेशा उपरांत तांका अपना घरांत धाडटात. काय प्रकरणांत भुरग्यांक तांचे मुळ गावांत धाडटात आनी गरज पडल्यार तांकां आपले कुटुंबा बरोबर परत मेळोवन दितात. भुरग्यांक तांचे मुळ गावांत धाडले उपरांत तांचे पुर्वसन आनी जीर्णाध्दार जावचो म्हूण भुरगीं कल्याण समिती हे प्रकरण त्या भुरग्यांच्या मुळ गांवच्या संबंधित भुरगीं कल्याण समिती कडेन धाडटा.
भीक मागपी 75 सोडणूक केल्ले भुरग्यां मदले 05 भुरग्यांची 2021त सोडणूक जाल्या, 21 भुरग्यांची 2022त, 09 भुरग्यांची 2023त जाल्यार 40 भुरग्यांची 2024त सोडणूक जाल्या. ह्या वर्सा जानेरात एकूय सोडणूक जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
