भांगरभूंय | प्रतिनिधी
दिवचल, प्रतिनिधी: गोंयांत बिगर गोंयकारांचें प्रमाण वाडतूच चल्लां. ताका लागून गोल्ड रॅकेट, मनशांची तस्करी, जॉब रॅकेट अश्यो गजाली सक्रीय जाल्यात. गोंय सरकाराच्या पुलीस खात्यान असल्या गजालींक मुळा सावन सोंपोवपा खातीर खर भुमिका घेतल्या. मात वेवसायिकांनी, लोकांनी, सामान्य नागरिकांनी हाचे पसून सादूर रावचें. तशेंच अशे तरेचीं रॅकेटां सोंपोवन उडोवचीं असो उलो मुख्यमंत्री डॉ. प्रमोद सावंत हांणी मारलो. सांखळे वेर्णेंकार डिझायनर्स ज्वेलरी ह्या गोल्ड शोरुमाचे उक्तावण कार्यावळी वेळार मुख्यमंत्री उलयताले.
थळावी स्वराज्य संस्था लोकप्रतिनिधी तशेंच वेवसायीक आनी सामान्य नागरिकांनी फटींगपणांक बळी पडनासतना सतर्क रावचें. अशे तरेचो कोणूय सांपडल्यार रोखडेंच पुलिसां कडेन संपर्क करचो. गोंय पुलिसांनी मनशाचे तस्करीचो एक प्रकारूय सध्या सोदून काडला. हे विशीं कारवाय केल्या. राज्यांत नोकरी घोटाळो, मनशाची तस्करी तशेंच भांगर लुटप अश्यो जायत्यो घडणुको घडल्यात. ह्या सगळ्या विशीं गोंय सरकारान खर भुमिका घेतिल्ल्यान पुलिसांनीय योग्य ती कार्यवाय केल्या. कांय गजालीं विशीं कारवाय सुरू आसा. आतां दरेका घटकान हे विशीं सतर्क रावप गरजेचें अशें मुख्यमंत्र्यान ह्या वेळार स्पश्ट केलें.
गोंयच्या सुवर्णकारांक विश्वकर्मा येवजणे खाला आसपावन घेतिल्ल्यान तांणी आपली विंगड विंगड कुशळटाय विकसीत करून आधुनीक कुशळटाय आत्मसात करतना दर्जेदार निर्मिती करची असो उलो मुख्यमंत्र्यांनी मारलो.
डॉ सावंत हे स्टार प्रचारक म्हणून महाराष्ट्रांत आशिल्ले. तांकां महाराष्ट्रांतल्या विधानसभा निकाला विशीं विचारलें तेन्ना महाराष्ट्रांत महायुतीक बरें वातावरण आसा. प्रधानमंत्री नरेंद्र मोदी हांणी दिल्लीं जायतीं आस्वासनां, संकल्पना पुराय केल्ल्यान लोक खूश आसात. विरोधक अकारण भावूक जावन फटींगपणाचो प्रचार करपाक गुंथल्यात. तरीय तांचो कसलोच परिणाम जावचोना. महायुतीक पूर्ण भोवमत मेळून सरकार स्थापन जातलें असो विस्वास मुख्यमंत्र्यांनी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
