भांगरभूंय | प्रतिनिधी
दिवचल, प्रतिनिधी: राज्यांत तशेंच देशांतल्या आदिवासी समाजाक खरो न्याय दिवपाचें काम फाटलीं धा वर्सां प्रधानमंत्री नरेंद्र मोदी हांणी केलां. फाटलीं साठ वर्सा विवीध राजवटींत आदिवासींचे उदरगती कडेन सामकी आडनदर जाली. तांकां सॉफ्ट टार्गेट करून देश पांवड्यार धर्मांतर करपाचो प्रकार जाल्लो. गोंयांतूय अशे प्रकार आयजूय चालूच आसात. ‘आलेलुयया’ सारकिल्ल्यां पसून सावधान रावप तशेंच अशे तरेची प्रवृत्ती भायर मारप गरजेचें. राज्यात धर्मांतराक कसलेच तरेचो थारो दिवचों ना अशी शिटकावणी मुख्यमंत्री डॉ. प्रमोद सावंत हांणी सांखळे दिली.
भगवान बिरसा मुंडा गौरव यात्रे निमतान रवींद्र भवन साखळे आयोजीत केल्ले कार्यावळीच्या उक्तावणा वेळार मुख्यमंत्री उलयताले. माचयेर जिल्लोधिकारी डॉ. स्नेहा गीते, दशरथ रेडकार, रोहन कासकार, सिद्धी प्रभू, गोपाळ सुर्लकार, डॉ. राजीव जी आनी हेर मानेस्त हजर आशिल्ले.
तरणाट्यां खातीर बिरसा मुंडा आदर्श आशिल्लो. उदक, जमीन, रानां राखपा खातीर तांणी ब्रिटीशांआड लढो दिलो. ब्रिटिशांनी देशांत विंगड विंगड माध्यमां वरवीं आदिवासींना सॉफ्ट टार्गेट करून धर्मांतराचो यत्न केलो. तांचे आड बिरसा मुंडा हांणी आवाज काडून उदक, रान, जमीन राखपा खातीर केल्लें काम प्रेरणा दिवपी आसा, अशें डाॅ. सावंत हांणी सांगलें.
प्रधानमंत्री नरेंद्र मोदी हांणी फाटलीं धा वर्सां देशाच्या हिरोंक देशा मुखार हाडपाचें व्हड काम केलां. सात वर्सां वेगवेगळे राजवटींत आदिवासी समाज पुरायेन आडनदर जालो, विवीध येवजण्यां पसून पयस उरलो. ब्रिटिश आनी पुर्तुगेजांनी धर्म परिवर्तनाचें काम करतना शिक्षणीक आनी अर्थीक नदरेन आशिल्ल्या लोकांक सॉफ्ट टार्गेट केलें. चंदनाची तस्करी केली, भांगर- रुपें, खनीज देशांतल्यान व्हेलें, अशेंय मुख्यमंत्री सावंत हांणी म्हणलें.
आदिवासी समाजाक आयज देश पांवड्यार व्हड स्थान मेळ्ळां. प्रधानमंत्री मोदी हांणी हजारांनी कोटींच्यो येवजण्यो राबयतना दरेका घराक समृद्ध करपाचो संकल्प केला. गोंयांतूय हे कार्य जाल्लें आसा. हाका लागून आयज आदीवासी समाज मानान मुखार सरता. कांय कडेन आजूनय ह्या समाजाक टार्गेट करपाचो यत्न चालू आसा. अशे तरेचें षडयंत्र खपोवन घेवचे नात, अशी शिटकावणी मुख्यमंत्र्यांनी दिली.
राज्यांतल्या आदीवासींक न्याय दितना तांचे विंगड विंगड प्रस्न सोडोवपा खातीर सुमार धा हजार अर्ज आयल्यात. आपल्या काळांत सुमार अडेज हजार अर्ज आपणें निकालांत काडिल्ल्याचें मुख्यमंत्र्यांनी स्पश्ट केलें.
बिरसा मुंडा हांचो आदशर आदर्श घेवन युवा पिळगेन उदक, रान आनी जमीन संरक्षणा खातीर सैमाचे पुजारी जावन कार्यरत रावचें आनी कसलेच तरेचे आक्रमण आपल्या धर्माचेर जावचे ना हाची काळजी घेवपा खातीर सज्ज रावचें असो उलो मुख्यमंत्र्यांनी मारलो.
रेडकार हांणी कार्यावळीचो उद्देश स्पश्ट केलो. उपरांत प्रधानमंत्री नरेंद्र मोदी हांणी व्हिडियो प्रक्षेपणा वरवीं बिरजा मुंडा हांच्या कार्याचो आढावो तशेंच येवजण्यांचो शुभारंभ केलो. ह्या वेळार सरकारी पांवड्यावेले अधिकारी, लोकप्रतिनिधी हजर आशिल्ले. हे कार्यावळीक जोडूनच भलायकी शिबीर तशेंच वेगवेगळ्या सरकारी येवजण्यांची म्हायती आनी दाखले दिवपाच्यो येवजण्योय उपलब्ध केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
