भांगरभूंय | प्रतिनिधी
पणजी : फाटलीं कांय वर्सां राज्यांत चेक बावन्साचीं प्रकरणां घडत आसात. राज्यांत २०२१ ते २०२५ ह्या काळांत चेक बावन्स जाल्ल्या प्रकरणांत २० हजार ५४३ केशी नोंद केल्यो. हाचोच अर्थ म्हयन्याक सरासरी ३४३ जाल्यार दिसाक सरासरी ११ केशी नोंद केल्यात. मुख्यमंत्री डॉ. प्रमोद सावंत हांणी विधानसभेंत दिल्ल्या लेखी जापेंतल्यान ही म्हायती मेळ्ळ्या. हे विशीं आमदार लेक्स रेजिनाल्ड हांणी प्रस्न हाजीर केल्लो.
जापेंतले म्हायती प्रमाण, वयल्या काळांत वट्ट खटल्यां मदले उतर गोंयांत १४ हजार ५८० जाल्यार दक्षिणेंत ५९६३ केशी नोंद केल्यात. उत्तर गोंयच्या दिवचल, फोंडें, वाळपयच्या न्यायालयांत अशा केशींचो आंकडो चड आसा. जाल्यार दक्षीण गोंयांत मडगांवच्या न्यायालयांत चेक बावन्साच्या केशींचो आंकडो तुळेंत अदीक आसा.
दर वर्सां प्रमाण पळयल्यार २०२१त उत्तर गोंयच्या न्यायालयांत अशा वट्ट २५३५ केशींची नोंद जाली. २०२५त हो आंकडो मात्सो उणो जावन २२३५ जालो.
दक्षीण गोंयच्या न्यायालयांत २०२१त ह्या प्रकरणांत १०१६ केशींची नोंद जाली. जाल्यार २०२५ त ९८९ केशी नोंद केल्यो. पांच वर्सांनी अश्या प्रकरणांतल्या वट्ट १०४० दुबावितांक सोदून काडपाक येस येवंक ना. हातूंत दिवचल, म्हापशें आनी फोंडेंच्या न्यायालयांत सुरू आशिल्ल्या केशींतले दुबावीत चड आसात. हे विशीं तांकां समन्स, वॉरंट काडटात. तशेंच अत्याधुनीक तंत्रज्ञानाचा वापर करून दुबावितांक सोदपाचें काम सुरू आशिल्ल्याचें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
