भांगरभूंय | प्रतिनिधी
भांगरभूंय । प्रतिनिधी
पणजीः 22 ऑगस्ट तें 29 ऑक्टोबर मजगतीं राज्यांत घुंवळी वखदां वेव्हारांच्या 47 प्रकरणांची नोंद जाली आनी तातूंत घुस्पल्ल्या 59 जाणांक अटक केल्या. तांतूतले 31 जाण गोंयां भायले आसात. 1 कोटी 44 लाख मोलाचीं 37.314 किलो घुंवळी वखदां घुंवळी वखदां विरोधी पंगडान जप्त केल्यांत.
घुंवळी वखदां विरोधी पंगडा, गोंय पुलीस, गुन्यांव फाटो आनी कोंकण रेल्वे पुलिसांनी मेळून 47 गुन्यांव नोंद केल्यात. अटक केल्ल्यां मदीं 19 गोंयकार, 9 विदेशी आनी 31 जाण गोंयां भायले आसात. विदेशीं नागरिकां मदीं नायजेरियन, रशियन , टांझानिया, तिबिरिया, अमेरिका आनी युकेच्या नागरिकांचो आसपाव आसा. गोंयां भायल्या गुन्यांवकारां मदीं 11 कर्नाटकांतले आसात. गुजरात, हरियाणा, तेलंगणा, आंध्र प्रदेश, उत्तर प्रदेश, राजस्थान, ओडिसा आनी पश्चीम बंगालच्या नागरिकांचो आसपाव आसा.
जप्त केल्ल्या घुंवळी वखदां मदीं सगल्यांत चड गांजो आसा. 34 किलो गांजो जप्त केलां. हशीश तेल, एमडीएमए, कोकेन, एलएसडी, एलएसडी पेपर, अॅक्टेसी, पावडर, मेथाफेथामायन. हेरॉयन मेळून 37.314 किलो घुंवळी वखदां जप्त केल्यांत. गोंय पुलिसांच्या घुंवळी वखदां विरोधी पंगडान सगल्यांत चड 8 गुन्यांव नोंद केल्यात. गुन्यांव फांट्यान 7, कळंगुटे पुलिसांनी 5, पेडणे, कोलवाळ आनी मडगांव पुलिसांनी दरेकी 3 गुन्यांन नोंद केल्यात. पोणे गोंय पुलिसांनी दोन जाल्यार वास्को, पणजी, साळगांव, काणकोण, फातोड्डें, म्हापशें आनी पर्वरी पुलिसांनी दरेकी एक गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
