भांगरभूंय | प्रतिनिधी
नागरी पुरवण खात्याच्या वरीष्ठ अधिकार्याची म्हायती
पणजीः गोंयांत गॅस सिलिंडर मुबलक प्रमाणांत उपबल्ध आसात. पूण लोक भियेवन सिलिंडर साठोवपाक लागिल्ल्यान ही समस्या जाल्या. सिलिंडर डिलर्सांक पुरवण सेगीत सुरू आसा आनी वेवसायीक सिलिंडर दिवप सुरू जाला, अशी म्हायती नागरी पुरवण खात्यातल्या अधिकार्यान दिल्या.
सिलिंडराचो फावो इतलो सांठो आसा आनी गॅस डिलर्साक दिसाक १ ते २ सिलिंडराच्यो गाडयो सिलिंडराच्यो येतात. लोक भियेवन सिलिंडर घेवपा खातीर गर्दी करतात म्हण ही समस्या मुखार आयल्या, अशें अधिकार्यान सांगलें.
वेवसायीक सिलिंडराक आयज सावन गॅस सिलिंडर दिवपाक सुरवात जावन तांकां वट्ट कोटा मदले २० टक्के कोटा सद्या तांकां दिला. ह्या कोटांत ल्हव-ल्हव वाड जातली. पुराय गोंयांत वेवसायीक आनी घरगुती दोनय सिलिंडर उपलब्ध आशिल्ल्यान सिलिंडरा खातीर घरपोच सेवा लेगीत आतां सुरू जाल्ल्याचें, अधिकार्यान सांगलें.
एचपीसीएल- कुंडय, बीपीसीएल- वेर्णा आनी आयओसीएल- बेळगांव हे तीन सिलिंडर एजन्सीतल्यान गोंयचे डिलर्सांक गॅस सिलिंडराची पुरवण जाता आनी तीन एजन्सीत फावो इतलो गॅस सांठो आसा. राज्यांतले रिते सिलिंडर थंयसर भरून हाडपाचें काम डिलर्सांनी चालिक लायिल्ल्याचें, अधिकार्यान सांगलें.
हे मजगतीं सद्या जाल्लो बोवाळ राज्यांतला सिलिंडर वेवहाराचेर पाळत दवरपा खातीर नागरी पुरवण खात्यान सगल्या डिलर्साचे कचेरेंत एक अधिकारी नियुक्त केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
