भांगरभूंय | प्रतिनिधी
ते बायलेची नार्को टेस्ट आनी घर मोडपाचो आदेश दिवप्याक अटक करपाची मागणी
मडगांव, प्रतिनिधी : आदीं गूंड सुपारी आनी पुलीस हप्ते घेताले अशें आयकल्लें. आतां पुलीसूच सुपारी घेतात. हें निलंबीत जाल्ले पुलीस सांगतात, तांणी दिल्ल्या अहवालांतल्यान हें स्पश्ट जालें. राज्यांत कायदो आनी सुवेवस्थेची वाट लागल्या. ते बायलेची नार्को टेस्ट करची आनी घर मोडपाचो आदेश दिला ताका अटक करची, अशी मागणी आमदार विजय सरदेसाय हांणी आसगांव प्रकरणाचेर उलयतना केली.
सरदेसाय हांणी सांगलें, आसगांव घर मोडिल्ल्याचें प्रकरण मुखार येताच आमदार डिलायला लोबो हांणी सरकाराकूच धारेर धरून गोंयकारांचीं घरां मोडपाक दिवची ना. कायदो आनी सुवेवस्था इबाडिल्ल्याचें सांगिल्लें. उपरांत समाजीक कार्यकर्ते, विरोधी पक्षाचे फुडारी आनी हेर जायते जाण घडणुके सुवातेर गेले. मात हांव थंय वचूंक ना. विधानसभेचे फाटभूंयेर लोकांक मेळपाक पणजी कार्यालयांत गेल्ले कडेन हें आगरवाडेकार कुटुंबीय एका थळाव्या वेवसायिका सयत आपल्याक मेळपाक आयलें. तांचें म्हणणें आयकून घेतले उपरांत व्हिडिओ पळयलो आनी आपणें पत्रकार परिशद घेवन सरकाराचेर टिका केली. हें घर बांदून दिवपाच्या प्रकारांत गुंतिल्ल्या पुलिसांचेर, गुंडांचेर कडक कारवायेची मागणी केली. पणजेच्यान मडगांवां येसर ते बायलेन घर मोडिल्ले खातीर सेटलमेंट केल्ल्याचें समजलें. उपरांत राज सावंत फेसबुक आयडी वयल्यान २०१२ वर्साचो एक पोस्ट वापरून आपूण ह्या प्रकरणांत गुंतिल्ल्याचो आरोप ताणें केलो. उपरांत आपणें समाजमाध्यमां वरवीं स्पश्टीकरण दिवन हें चुकीचें आशिल्ल्याचें सांगिल्लें. मात भाजपाच्या ट्रोल आर्मीन ह्या पोस्टाचो आदार घेवन ती व्हायरल करून बदनामी करपाक सुरू केले उपरांत सायबर क्रायमा कडेन कागाळ केली. कागाळ करतांच ती पोस्ट काडून उडयली. गुन्यांव फांट्यान ह्या प्रकरणाचीय खोलायेन चवकशी करची आनी खरें कितें तें मुखार हाडचें. भाजप प्रदेशाध्यक्ष, मुख्यमंत्र्यांनी पत्रकार परिशद घेवन आपल्याचेर आरोप करचे. अशे लिपून आरोप करचे न्हय अशें आमदारान म्हणलें.
ह्या प्रकरणांत आपलें नांव घुस्पावपाचो हो प्रकार आशिल्लो. आतां गोंय पुलीस महासंचालकां कडल्यानूच पुलीस निरीक्षकांनी घर मोडिल्ल्याच्यो सुचवण्यो आयिल्ल्याचें समजता. हे विशीं अहवालाची एक प्रत व्हायरल जाल्या. हणजुणचे पुलीस निरीक्षक, उपनिरीक्षक निलंबीत जाले उपरांत पुलीस महासंचालकांचें नांव उक्तें जालां. ही बायल म्हजे कडेन कित्याक आयली, हाचेरूय दुबाव येता. आपलें नांव ह्या प्रकरणांत घुस्पावपाचो प्रकार जाला आसतलो. राज्य सरकारान कायद्या प्रमाण ह्या प्रकरणांत कारवाय करपाची गरज आसा, अशेंय सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
