राज्यांत उटंगार कायम
भांगरभूंय | प्रतिनिधी
पणजी : राज्यांत बिरेस्तारा पावसान मात्सो विसव घेतिल्लो. मात रातीं पावसाचो नेट बरोच वाडलो. शुक्रारा सकाळीं घोग्यांनी पावस झडलो. तशेंच खुबश्या सुवातांचेर झाडा पडून लुकसाणूय जालें. राज्यांतल्या विवीध रस्त्यांचेर उदक सांठून उरलें. सेगीत झडपी पावसाक लागून वास्को हॅप्पी अपार्टमेंट इमारतीच्यो दोन बाल्कनी कोसळून पडल्यो. ह्याच उटंगराचो अदमास पळोवन हवामान खात्याने आयज पावसाचो ऑरेंज अलर्ट जारी केला.
पणजे उदकान भरलें
पणजे आयज सकाळीं पावस बरोच झडलो. दयानंद बांदोडकर रस्तो, कदंब बस स्टॅण्ड वाठार, पाटो, सांतिनेज वाठारांतल्या कांय रस्त्यांचेर उदक सांठिल्ल्यान येरादारी विस्कटली. पणजेच्या रस्त्यांवेल्यान वाहन काडटना चालकांक बरेच त्रास सोंसचे पडले.
चोवीस वरांक सरासरी १.७४ इंच पावस
शुक्रारा सकाळीं ८.३० वरांचेर सोंपिल्ल्या चोवीस वरांक राज्यांत सरासरी १.७४ इंच पावसाची नोंद जाली. हाचे मजगतीं मुरगांवां २.७८ इंच, धारबांदोड्यां २.४६ इंच पावस झडलो. राज्यांत १ जून ते २९ ऑगस्ट मजगतीं सरासरी ११०.८६ इंच पावसाची नोंद जाली.
३० ऑगस्ट ते ४ स्पटेंबर मध्यम पावस
हवामान खात्यान ३० ऑगस्ट ते ४ स्पटेंबर मजगतीं मध्यम पावसाची शक्यताय उक्तायल्या. ते प्रमाण ह्या स दिसां खातीर पावसाचो येलो अलर्ट जारी केला. शुक्रारा पणजे चडांत चड तापमान २९.२ अंश जाल्यार उण्यांत उणें २४.२ अंश सेल्सिअस तापमानाची नोंद जाली. मुरगांवां चडांत चड तापमान २७.८ अंश आनी उण्यांत उणें तापमान २३.८ अंश सेल्सिअस उरतलें. फुडले स दीस राज्यांतलें तापमान चडांत चड ३० अंश जाल्यार उण्यांत उणें तापमान २४ अंश सेल्सिअस उरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
