भांगरभूंय | प्रतिनिधी
बिएसएनएल गोंय फांट्याचे सरवेवस्थापक एल. बी. लाल हांची म्हायती
पणजीः राज्यांत 4 जी टोवर्स उबारपा खातीर गांवगिर्या वाठारांतल्या 52 गांवांची निवड केल्या. तातुंतल्या 30 गांवांनी 4जी सेवा कार्यरत जाल्या. ते भायर 191 ग्रामपंचायतींनी भारत नॅट प्रोजॅक्टा खाला ऑप्टिकल फायबर इंटरनॅट जोडणी दिल्या, अशी म्हायती भारत संचार निगम लिमिटेडचे (बिएसएनएल) सरवेवस्थापक एल. बी. लाल हांणी दिल्या.
1 आॅक्टोबराक बीएसएनएलाक 25 वर्सा पुराय जातात. बीएसएनएलाच्या रुप्या महोत्सवाचे फाटभूंयेर लाल हांणी बीएसएनएलाच्या गोंय मुख्यालयाक आपयल्ले पत्रकार परिशदेंत बीएसएनएलाच्या वाटचालीचेर उजावाड घातलो.
1 ऑक्टोबर 2001 बीएसएनएलाची थापणूक जावन 1 ऑक्टोबर 2025 त 25 वर्सां पुराय जातात आनी ह्या 25 वर्सांच्या काळांत आमी खूब चडटी देंवती पळयल्या, अशें लाल हांणी म्हणलें. एक काळार बीएसएनएलाक खुपश्या अडचणींक तोंड दिवचें पडलें. हांतूत सगळ्यांत चड नोकरशाय प्रक्रिया, निधीचो उणाव आनी पोरणें जायत वचपी तंत्रगीन्यान हें समस्यांचो मुखेल आसपाव आसलो. आतां खाजगी टेलिकोम कंपन्यां वांगडा सर्तीच्या पांवड्यार देंवपाचो वेळ आयला, असो विस्वास लाल हांणी उक्तायलो.
ज्यो खाजगी कंपनी आसल्यो त्यो फकत मेट्रो आनी व्हडल्या शारांतूच लक्ष करून फायदो काडटाले. मात बीएसएनएल एक सामाजीक कार्य बांदील जावन गांवगिर्या आनी खेडे वाठारांत आपली सेवा दितले. इशान्य भारत आनी आदिवासी क्षेत्र सारकिल्ल्या वाठारांनी टॅलिकोम चलोवपाक फायद्याचें थारना थंय टॅलिकॉम जोडणी दिवपाक बीएसएनएल खूब वावुरला, अशें लाल हांणी सांगलें.
गोंय राज्यांत गिरायकांक लॅन्डलायन आनी मोबायल जोडणी मेरेन मर्यादीत राव नासतना बिएसएनएल डिजीटल भारत निधी खाला 4जी सेच्युरेशन आनी भारत नेट ही येवजण समाजीक कार्याच्या नात्यान चालीक लायता, अशें लाल हांणी म्हणलें.
जीओ आनी एअरटेल सारकिल्ल्यो खाजगी कंपनी ज्या गांवगिर्या आनी खेडे वाठारांनी पावना त्या वाठारांत बिएसएनएलान 4 जी सेच्युरेशन प्रकल्पा खाला 4 मोबायल सेवा चालीक लायला. ह्या प्रकल्पा सकयल 4 जी सेवा दिवपा खातीर 52 गांवांची निवड जाल्या. आतां मेरेन 52 मदल्या 30 गांवांनी 4 जी टॉवर उबे जाल्यात. येता त्या 3- 4 म्हयन्यां भितर ह्या उरिल्ल्या सगल्या गांवांनी 4 जी टोवर्स येतले, अशी म्हायती लाल हांणी दिली.
ह्या गांवांची भौगोलीक परस्थिती, जाग्यांचे उणाव आनी लोकांचो विरोध ह्या कारणांक लागून ह्या गांवांनी 4 जी टोवर्स उबारप एक आव्हान जावन रावलें. मात राज्यांचीं सरकारी खातीं जशे की महसूल, आयटी, रान खातें आनी दोनूय जिल्लोधिकारी तशेंच तांच्या अधिकार्यांनी दिल्ल्या तेंक्यांक लागून जागो मेळोवन दिवपाक सोपे जाले. येता त्या कांय काळांत गोंयच्या आनीक कांय गांवांचो 4 जी सेच्युरेशन प्रकल्पा खाला आसपाव करतले, अशें लाल हांणी सांगलें.
भारत नेट प्रकल्पा वरवीं बिएसएनएलान राज्यांतल्या वट्ट 191 ग्राम पंचायतींनी ओप्टीकल फायबर इंटरेनेट जोडणी दिवपाचें काम हातांत घेतलें. अत्याधुनीक ऑप्टिकल फायबर टॅक्नोलॉजी वरवीं 100 जीबी तांक आशिल्ली जोडणी गांवगिर्या वाठारांक दितले. ह्या प्रकल्पा खाला वट्ट 1500 किलो मिटर इतलें फायबर घालतले. तरणाट्यांक टॅलिकॉम इन्फ्रा प्रोव्हायडर्स म्हण नेमणूक करून पंचायतींतल्यान फायबर कनॅक्टीव्हीटी घरा घरांनी व्हरतले, अशी म्हायती लाल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
