भांगरभूंय | प्रतिनिधी
पणजी ः केंद्र सरकाराच्या शिक्षण खात्यान हालींच जाहीर केल्ल्या अहवालांत राज्य सरकार उक्ताडार आयला. राज्यांतल्या सरकारी शाळांनी मुळाव्या सुविधांचो उणाव आसा हें ह्या अहवालांतल्यान उक्ते जाला असो आरोप आप फुडारी रामराव वाघ हांणी केला. शेनवारा पणजेत जाल्ले पत्रकार परिशदेंत ते उलयताले. ह्या वेळार सलमान खान आनी रॉक मास्काऱ्हेनस हाजीर आशिल्ले.
वाघ हांणी सांगलें, केंद्रीय अहवाला प्रमाण, राज्यांत वट्ट 1487 शाळा आसात. तातूंत 789 सरकारी शाळा आसात. फकत 21 टक्के सरकारी शाळांनी संगणक आसा. हलींच्या काळांत संगणक ही एक गरज जाल्या. अशें आसून लेगीत फकत 21 टक्के सरकारी शाळांनी संगणक आसप ही धक्को दिवपी गजाल. उरफाटें राज्यांतल्या 95 टक्के अनुदानित शाळांनी संगणकाची सुविधा उपलब्ध आसा.
तांणी म्हणलें, शिक्षणाच्या मळार गोंय फुडें आसा अशें सरकार सांगत आसता. पूण परिस्थिती वेगळीच आसा. गोंयां परस दिल्लींतली शिक्षणीक सुविधा बरी आसा. थंयच्या सगळ्या सरकारी, अनुदानित शाळांनी शंबर टक्के संगणक आसात. गोंयांतल्या सरकारी शाळांचे तुळेंत दिल्लींतल्या सरकारी शाळांनी चड विद्यार्थी शिकतात. राज्यांतल्या सरकारी शाळांची हालींच्या दुरुस्ती केल्या. पूण विद्यार्थ्यांचो आंकडो उणो आसा.
खाजगी वा अनुदानित शाळांनी शिक्षण परवडना म्हणून जायते जाण आपल्या भुरग्यांक सरकारी शाळांनी घालतात. पूण राज्यांतल्या सरकारी शाळांची स्थिती अशी आसत जाल्यार गरीब पालकांक लेगीत परवडना तें शिक्षण घेवचें पडटलें. हाचे भायर सरकारान एक शिक्षक शाळा, शून्य प्रवेश शाळांचेरूय लक्ष दिवचें अशें वाघ हांणी मत मांडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
