राज्यांतल्या मंत्र्यांच्या कामगिरीचेर पक्षाचे केंद्रीय फुडारी दवरतले नदर
भांगरभूंय | प्रतिनिधी
मुख्यमंत्र्यां सयत गोंय भाजपा अध्यक्ष दामू नायक हांणी राष्ट्रीय अध्यक्ष नड्डा कडेन केली चर्चा
पणजीः राज्यांतल्या मंत्र्यांच्या कामगिरीचेर आनी वागणुकेचेर हाचे फुडें पक्षाचे केंद्रीय फुडारी नदर दवरतले. तशेंच पक्षाचे केंद्रीय फुडारी मंत्र्यांच्या कामगिरीचो नियाळ घेतले. राष्ट्रीय अध्यक्ष जे. पी. नड्डा आनी सरचिटणीस बी. एल. संतोष हांचे कडेन संघटना आनी सरकाराच्या कामगिरी विशीं चर्चा केल्ल्याची म्हायती गोंय भाजपा अध्यक्ष दामू नायक हांणी दिली.
गोंय भाजपाचे अध्यक्ष जाले उपरांत दामू नायक हांणी राष्ट्रीय अध्यक्ष जे. पी. नड्डा आनी सरचिटणीस बी. एल. संतोष हांची दिल्लींत पयलेच खेपे भेट घेतली. राष्ट्रीय अध्यक्ष जे. पी. नड्डा हांचे कडेन जाल्ले चर्चे वेळार मुख्यमंत्री डॉ. प्रमोद सावंत हाजीर आशिल्ले.
येवपी विधानसभा वेंचणुकेच्या फाटभुंयेर पक्षाची संघटना आनीक घटमूट करपाची गरज आसा. संघटना घटमूट करपा खातीर वेगवेगळ्या कार्यावळींची येवजण करपा वांगडाच जनसंपर्क वाडोवप गरजेचें आसा. मंत्री आनी सरकाराच्या कामगिरीचो वेळार नियाळ घेवचो. मंत्र्यां खातीर प्रगती पुस्तक तयार करपाची गरज आसा अशा विशयांचेर चर्चा जाल्ल्याची म्हायती दामू नायक हांणी दिली. पक्ष संघटनेचेर आनी संघटनात्मक वावराचेर अध्यक्ष नड्डा हांणी तांकां मार्गदर्शन केलें अशेंय दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
