भांगरभूंय | प्रतिनिधी
गरजेवंतांची वळेरी तयार करपाचें काम सुरू: पर्पल फेस्टांतलो उपक्रम
पणजी : पर्पल फेस्टिवला मजगतीं राज्यांतल्या दिव्यांग मनशांक सुमार २ कोटी रुपयांची उपकरणां दितले. हातूंत दिव्यांगां खातीर गरजेचीं आशिल्लीं सहाय्यक उपकरणां, यंत्रांचो आसपाव आसा. सध्या दिव्यांग सक्षमीकरण खात्या वतीन अशा गरजेवंतांची वळेरी तयार करपाचें काम सुरू आशिल्ल्याची म्हायती मंत्री सुभाष फळदेसाय हांणी दिली. बुधवारा पणजे जाल्ले पत्रकार परिशदेंत ते उलयताले. ह्या वेळार दिव्यांगजन आयुक्त गुरू पावसकार, अपर्णा प्रभुदेसाय, दिंव्यांशु गंत्रा हाजीर आशिल्ले.
फळदेसाय हांणी सांगलें, फाटल्या पर्पल वेस्टांत आमी हो उपक्रम राबयल्लो. ताका मेळिल्लो प्रतिसाद पळोवन अंदूंय दिव्यांगांक उपकरणां दिवपाचो निर्णय घेतला. चार दिसांच्या काळांत म्हाला प्रमाण मजत दितले. फेस्टिवलांत दिव्यांगांच्या प्रस्नांचेर चर्चा करपाक २२ परिशदो घेतले. तशेंच कुशळटाय उदरगत कार्यशाळा आयोजीत करतले. अंदूं दिव्यांगां खातीर प्लेसमेंट कॅम्प भरतले.
फेस्टिवला खातीर आतां मेरेन ९ हजार जाणांनी नोंदणी केल्या. हो आंकडो १३ हजार मेरेन पावपाची शक्यताय आसा. आतां मेरेन २५ देशांच्या प्रतिनिधींचो वांटो निश्चीत जाला. फेस्टिवलाक दर दिसा २५ हजार लोक भेट दितले असो आमचो अदमास आसा.
फेस्टिवलांत दिव्यांगां खातीर खेळां, संस्कृती, शिक्षण अश्या विंगड विंगड मळावेले १०० परस चड इव्हेंट आसतले. सध्या राज्यांत फेस्टिवला खाला सुरू आशिल्ल्या बुद्धिबळ, क्रिकेट सर्तींक विवीध राज्यांतल्यान बरो प्रतिसाद मेळटा.
१२ ऑक्टोबराक मॅरेथॉनाचें आयोजन
फळदेसाय हांणी सांगलें, पर्पल फेस्ट, एबीबीएफ
आनी रोटरी क्लबा वतीन १२ ऑक्टोबराक पणजे मॅरेथॉनाचें आयोजन केलां. हातूंत दिव्यांग आशिल्ले आनी नाशिल्ले एकठांय धांवतले. मॅरेथॉन ३, ५ आनी ७ किमी आसतली. हातूंत ५०० परस चड सर्तक वाटो घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
