भांगरभूंय | प्रतिनिधी
पणजी : गंभीर दुयेंसां आशिल्ले दुयेंती, तशेंच तांच्या कुटुंबियांक उपचारा बगर हेर तरेचे विशेष काळजीची (पॅलेटीव्ह केअर) गरज आसता. राज्यांतल्या दरेका हॉस्पिटलांत अशी सुविधा दिवपाक यत्न सुरू आशिल्ल्याचें भलायकी मंत्री विश्वजित राणे हांणी सांगलें. शुक्रारा गोमेकोंतल्या सुपर स्पेशालिटी ब्लॉकांत पॅलेटीव्ह केअर सेवेच्या उक्तावणा वेळार ते उलयताले.
ह्या वेळार डॉ. युरी डायस अंबोरकार, पूजा सिंग, डॉ. कार्ल जेम्स आनी हेर विभाग मुखेली हाजीर आशिल्ले.
राणे हांणी सांगलें, पॅलेटीव्ह केअर धोरण तयार करून ती सेवा सुरू करपी गोंय हें देशांतलें पयलें राज्य. घरांतल्या दुयेंत आनी जाण्ट्या मनशांक अशे सेवेची गरज आसता. म्हज्या घरांतूय अशे मनीस आसात. म्हाका तांचो त्रास समजता. हांव जे तरेची पॅलेटीव्ह केअर घेतां ते पद्धतीची सेवा गोंयच्या सामान्य दुयेतींक मेळची म्हूण हो उपक्रम सुरू केला. बेगीनूच राज्यांतल्या सगल्या हॉस्पिटलांनी तशेंच घरां मेरेन ही सेवा पावोवपाचो आमचो विचार सुरू आसा.
हाका लागून आमी डिफिट एनसीडी आनी तेवा हांचे वांगडा सामंजस्य करार केला. गोंय हें ल्हान राज्य आशिल्ल्यान ही सेवा सगल्याक दिवप शक्य आसा. हातूंत सुरवातेक कांय आडमेळीं आयल्यो तरी जनतेची सेवा करपाक आमी बांदील आसात. पॅलेटीव्ह केअर हो एके तरेन जनतेचो अधिकार. आमी तो तांकां मेळोवन दिवपाक यत्न करतात. प्रधानमंत्री नरेंद्र मोदींनी अंत्योदय तत्वाचो पुरस्कार केला. हेच फाटभूंयेर आमी काम करतात.
तेन्नाच तुयें हॉस्पिटल ताब्यांत घेतले
आमकां पेडण्यांची फुडल्या वीस वर्सांची गरज पुराय करपी हॉस्पिटल जाय. तुयें हॉस्पिटला खातीर गतरजेची यंत्रणां, मनीस बळ, डॉक्टर, तज्ञ आनी हेर गजाल मेळ्ळे उपरांत आमी ते ताब्यांत घेतले.दक्षीण गोंय जिल्लो हॉस्पिटला खातीर गरजेच्यो आशिल्ल्या सुविधां खातीरचे प्रस्ताव मुख्यमंत्र्यांक दितले अशें मंत्री राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
