राज्यांतल्या चार म्हालांची एचआयव्ही स्थिती हुस्क्याचीः डॉ. हुम्रस्कार

भांगरभूंय | प्रतिनिधी

पणजीः बार्देस, तिसवाडी, मुरगांव आनी साश्ट म्हालांत एचआयव्ही एड्साची स्थिती हुस्को करपा सारकी आसा. हेर तालुक्यांच्या तुळेंत ह्या तालुक्यांनी पॉजीटिव्हीटी दर सगळ्यात चड आसा. एड्स दुयेंसा आड बेफीकरींक लागून ही हुस्क्याची स्थिती जाला. ह्या म्हालांनी एड्स विशीं जनजागृती नेटान चालू आसा, अशी म्हायती गोंय राज्य एड्स नियंत्रण सोसायटीची संचालक डॉ. ललीता हुम्रस्कार हांणी दिली.
तांणी दिल्ले म्हायती प्रमाण, बार्देस, तिसवाडी, मुरगांव आनी साश्ट म्हालांत एड्स पॉजीटीव्हीटी दर फाटल्या दोन वर्सां परस उणो जाला आनी दुयेंती भितर उणाव दिसून आसलां. पूण हेर तालुक्यांची तुळा केल्यार ह्या चार तालुक्यांनी दर 10 पटीन चड आसा.
फाटल्या वर्सां जानेवारी ते डिसेंबर 2024सात तिसवाडी म्हालांत पॉजीटीव्हीटी दर 11.9 टक्के, बार्देस म्हालांत 18.7 टक्के, साश्ट म्हालांत 12.3 टक्के आनी मुरगांव म्हालांत 14 टक्के आसा. जाल्यार हेर म्हालांनी दर सरासरी 0.04 ते 5.5 टक्के आसा.
जाल्यार वर्स 2023 सांत जानेर ते डिसेंबर मजगती तिसवाडी म्हालांत पॉजीटीव्हीटी दर 14.6 टक्के, बार्देस म्हालांत 20 टक्के, साश्ट म्हालात 15 टक्के आनी मुरगांव म्हालांत 11.9 टक्के दर आशिल्लो. फक्त मुरगांव म्हालातच पोजिटीव्हीटी दरांत वाड जाल्या.
जाल्यार एड्स प्रकरणां संबंदी 2023सात तिसवाडी म्हालांत 38 केसी नोंद जाल्ल्यो आनी 2024त 28 केसी नोंद जाल्यो. 2023सात बार्देस म्हालांत 52 केसी नोंद जाल्ल्यो आनी 2024त 44 केसी नोंद जाल्यो. 2023त साश्ट म्हालांत 39 केसी नोंद जाल्ल्यो आनी 2024 त 29 केसी नोंद जाल्यो. 2023 त मुरगांव म्हालात 31 केसी नोंद जाल्ल्यो आनी 2024 त 33 केसी नोंद जाल्यो.
हे चारुय म्हाल हाय रिस्क बिह्येवीयर श्रेणीत येतात. हाचो अर्थ बाधीकार जावपी लोक उक्त्या विचाराचे आसात आनी दुयेंसा संबंदी ते गंभीर नात. आयच्या काळांत डेटींग एप्स आनी हेर गजाली वरवी लैगीक संबंध वाडल्यात पूण ते खातीरुच ते कसलीच जतनाय घेनात. अनपेक्षित शारीरीक संबंधाक लागून ही समस्या तयार जाल्या, अशी म्हायती हुम्रस्कार हांणी दिली.
हे खातीर आमी नेटान जागृताय उपक्रम राबोवपाक सुरवात केल्या. 366 गावांतल्या शाळां आनी पंचायतींनी जागृताय चालू जाल्या. राज्यांत 9 एनजीओ 16 उपक्रमा वरवीं काम करतात आनी एचआयव्ही खातीर व्हडा प्रमाणांत टेस्टींग चालीक लायलां. कोण एचआयव्ही बादीकार आसात तांका लोकांनी कलंकीत करचे न्हय. जे मेरेन तांका कलंकीत करचे बंद जावचे नात ते टेस्ट करपाक फुडें येवचे नात, असो उलो डॉ. हुम्रस्कार हांणी मारला.