भांगरभूंय | प्रतिनिधी
भांगरभूंय । प्रतिनिधी
पणजीः राज्यांतल्या साळावली, अंजुणे, आमठाणे आनी पंचवाडी ह्या चार धरणांतल्या उदकाची पातळी 9 एप्रील मेरेन 50 टक्क्यां परस उणी जाल्ल्यान पावसाक वेळार सुरवात जाली ना जाल्यार सगळे कडेन उदकाचो उणाव जावपाची शक्यताय आसा.
साळावली धरणांत 47.1 टक्को, अंजुणे धरणांत 36.5 टक्के, आमठाणे धऱणांत 36.1 टक्को जाल्यार पंचवाडी धरणांत 36.2 टक्के उदकाचो साठो आसा. तिलारी धरणांत 47.5 टक्के उदक आसा. उदका स्रोत खात्यान मात पावसाक सुरवात जाय मेरेन उदकाचो व्हो साठो पावतलो अशें सांगलां.
फुडल्या दोन म्हयन्यांत वाडिल्ल्या उबाळ्याक लागून उदकाची मागणी लेगीत वाडटली. ताका लागून धरणांतल्या उदकाचो साठो उणो जायत वतलो. काणकोण तालुक्यांतल्या चापोली धरणांत सगल्यांत चड म्हणल्यार 57 टक्के उदक आसा. ताच्या फाटल्यान गावणे जलाशयांत 55. 1 टक्को उदक आसा. साळावली धरणांतल्यान सध्या दर सेकंदाक 10.50 घनमीटर उदकाचो विसर्ग चल्ला जाल्यार अंजुणे धरणांत हें प्रमाण 2.40 घनमीटर आसा. पोरू 11 जूनाक राज्यांत मान्सून दाखल जाल्लो. मात 20 जून मेरेन पावस पडपाचें प्रमाण सामकें कमी आशिल्ल्यान धरणांतल्या उदकाचो साठो सामको उणो जाल्लो. जूनाच्या निमण्या सप्तकांत आनी जुलयच्या पयल्या सप्तकांत उटंगाराचो पावस पडिल्ल्यान धरणाच्या उदकांत नेटान वाड जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
