राज्यांतल्या खाजगी कंपनीं कडल्यान रोजगाराची म्हायती एकठांय करपाचो आपचो उपक्रम

भांगरभूंय | प्रतिनिधी

पणजी ः आम आदमी पक्ष राज्यांतल्या खाजगी कंपनीं कडल्यान रोजगाराची म्हायती एकठांय करुन डेटाबेस तयार करतलो. ही म्हायती राज्यांतल्या बेकार थळाव्या लोकांक दितले अशें पक्षाचे प्रदेशाध्यक्ष अमित पालेकार हांणी सांगलें. शेनवारा पणजेत जाल्ले पत्रकार परिशदेंत ते उलयताले. ह्या वेळार रामराव वाघ, सलमान खान, रोहन नायक आदी हाजीर आशिल्ले.
पालेकार हांणी सांगलें, केंद्रीय अहवाला प्रमाण राज्यांत बेकारीचें प्रमाण चड आसा. पूण केंद्रीय अहवाल चुकीचो आसा अशें राज्य सरकार सांगता. देखून बेकारी विशीं सरकार कितें करतलो हाची आस्त ना. हे खातीर आपच्या युवा फांट्यान रोजगार डेटाबेस तयार करपाचो उपक्रम सुरू केला. हे खातीर आमी कांय खाजगी कंपनीं कडेन उलोवणे सुरू केलां. ते खातीर तांणी आमकां सकारात्मक प्रतिसादय दिला.
गोंय मनीसबळ विकास म्हामंडळान 944 रिक्त पदांचेर भरती करतलें. हे प्रक्रियेंत भानगड जाल्ल्याचे आमकां कळ्ळां. हें म्हामंडळ एमटीएस आनी हेर कर्मचाऱ्यांच्या पगाराचेर जीएसटी लायता ही अजापाची गजाल. ह्या जाग्यांचेर आरक्षण ना. दर वर्सा हजारांनी पदवीधर तयार जावपाक लागल्यात. पूण सरकाराक रोजगार उपलब्ध करुंक शकना. आयटी, उद्देग ह्या सारक्या सगळ्याच मळार सरकाराक अपेस आयलां अशेंय तांणी सांगलें.
गोंय मनीसबळ विकास म्हामंडळ पुराय क्षमतेन काम करीना अशें रामराव वाघ हांणी सांगलें. आमदार रुडोल्फ फर्नांडीस हांणी फाटल्या अडेज वर्सांत एकूय बसका घेतली ना. म्हामंडळ आसून लेगीत सरकाराचे हेर खातें वेगवेगळ्या सेवां खातीर खाजगी कंपनीं कडल्यान सोवा घेतात. आमकां मेळिल्ले म्हायती प्रमाण फकत फाटल्या वर्सा सरकारान अशा सेवां खातीर 60 कोटी परस चड खर्च केला. आमी ताचो सविस्तर अभ्यास करतात. रोखडीच ही भानगड आमी भायर काडटलें अशें रामराव वाघ हांणी सांगलें.