राज्यांतल्या अपघातांचे जातले विश्लेशण

भांगरभूंय | प्रतिनिधी

-अपघात उणे करपा खातीर रस्तो सुरक्षा समितीचे बसकेंत निर्णयपणजीः हालीच फाटले कांय दीस जावपी अपघाताच्यो घडणुको हो हुसक्याचो विशय जावन आसा. हे अपघात जावचे न्हय, ते टळपा खातीर तांचे विश्लेशण चालू आसा. नोव्हेंबराच्या पयल्या सप्तकांत ह्या अपघातांचे विश्लेशण पुराय जावन हे विशींचो डेटा ऑनलायन जाहीर करतले आनी संबंदींत खातें ह्या विश्लेशणा वरवीं अपघात उणें करपा खातीर उपाय येवजण हातांत घेतले. हे विशीं मंगळारा जाल्ले उत्तर गोंय रस्तो सुरक्षा समितीचे बसकेंत चर्चा जाली.

अतिरीक्त जिल्लोधिकारी महादेव आरोंदेकार हांचे फुडारपणा खाला उत्तर गोंय रस्तो सुरक्षा समितीची बसका पणजेच्या जिल्लोधिकारी कचेरेंत संमत जाली. ह्या वेळार गोवा कॅन एनजीओचे समन्वयक रोलन्ड मार्टीन्स, येरादारी, पुलीस, पर्यटन, एक्सायज आनी संबंदींत खात्याचे अधिकारी हजर आशिल्ले. बसके उपरांत चर्चेंक आयिल्ल्या मुद्द्या विशीं रोलन्ड मार्टीन्स हांणी म्हायती दिली.

मार्टीन्स हांणी सांगलें, हालीच एका परस चड वाहनां मदीं जावपी पांच घडणुकांत दोन ते तीन लोकांनी जीव वगडायला. हे घडणुकेंतल्यान शिकून संबंदींत खात्यांनी ताची देख घेतल्या. येता त्या दोन दिसा भितर संवसारीक रस्तो येरादारी बळी यादस्तीक दीस मनयतले. ह्या दिसा हे अपघात जावचे न्हय हे खातीर कसलीं पावलां उबारप हाचेर चर्चा जातली, अशें मार्टीन्स हांणी सांगलें.

दोन दिसा पयलीं आमी अपघातांत मरण येवपाची घडणूक पळयल्या. ही घडणूक कित्याक लागून जाली, कशी जाली हाचे योग्य विश्लेशण हे सारिकिल्ले अपघात आडावपाक गरजेचे थारतले. नोव्हेंबर म्हयन्यांत हे विश्लेशण पुराय जातले अशी आस्त आसा. हडबडींत गाडयो चलयिल्ल्यान वा बाबत रस्त्यांक लागून अपघात जातात, हे सारकिल्ली कारणांचें विश्लेशण जातले. हो विशय फक्त पत्रकारांनीच कित्याक उजवाडांक हाडपाक जाय. रस्तो सुरक्षेचो प्रस्न येता तेन्ना अधिकाऱ्यांनी लेगीत फुडाकार घेवप गरजेचें, अशे मार्टीन्स हांणी म्हणलें.

बेवारस उडयिल्ल्यो गाडयो लेगीत रस्त्यार खूब त्रास करता. मडकय गाडयो स्क्रेप करपाचो प्लांट तयार जावपाचो आसा. देखून अशो बेवारस आशिल्ल्यो गाडयो स्क्रॅप करपा खातीर ह्या गाडयांच्या धनयां मदीं जागृताय करतले, अशें मार्टीन्स हांणी सांगलें.

सोरो पियेवन गाडयो चलोवं नाकात हे मोहीमे विशीं एक्सायज आनी पर्यटन खात्यां कडेन चर्चा जाली. सगळ्या बार आनी रेस्टोरण्टांनी सोरो पियेवन गाडी चलोवं नाकात संदेश दिवपी तकटे लायल्यात. पूण ताचे पालन जायना. हाचे खरसाणेन पालन जावचे अशी सुचोवणी दिवन तशेंच दर्यादेगेर गाडी चलोवपाचे बंद जावचे हे खातीर सुचना तकटे उबारपाचे निर्देश दिल्यात, अशी म्हायती मार्टीन्स हांणी दिली.

गोंयची लोकसंख्या 15 ते 16 लाख आसा. पूण गोंयाक 1 कोटी परस चड पर्यटक भेट दितात, देखून साधन सुविधांची जापसालदारकी कोणी घेवपाची. फक्त गोंयच्या लोकसंख्ये पुरती साधन सुविधा मर्यादीत आशिल्ल्यान भलायकी सेवा आनी रस्त्यांचेर ताण येता. वाहनांची संख्या वाडिल्ल्यान येरादारी खात्याचेरूय ताण येवन वाहनांची कोंयडी जाता. हाचेर दीर्घकालीन उपाय काडचो म्हण एक प्रस्ताव फुडल्या अर्थीक वर्सा आमी सरकारा कडेन मांडटले, अशे मार्टीन्स हांणी सांगलें.