भांगरभूंय | प्रतिनिधी
पणजी, प्रतिनिधी ः पणजेची समाज कल्याण खात्याची इमारत धोकादायक म्हूण घोशीत जाल्या. ते भायर गोंय भरच्यो सरकारी इमारतीची परिस्थिती सामकीच बाबत जाल्या. पुण सरकार त्यो दुरुस्त करपाक कसलीच पावलां उबारनात, असो आरोप काँग्रेसीन केल्या.
समाज कल्याण खात्याचे इमारतीचे बिरेस्तारा पाखें कोसळ्ळे. पूण, बरी गजाल म्हळ्यार कोणांक कसलीच दुखापत जावंक ना. ह्या विशया वयल्यान गोंय काँग्रेस प्रदेशाध्यक्ष अमिट पाटकार आनी हेर काँग्रेसीच्या शिष्टमंडळान आल्तीन भौशिक बांदकाम खात्याचे कचेरेत वचून मुखेल अभियंतो उत्तम पार्सेकार हांकां घेराव घातलो आनी दायज आनी हेर सरकारी खात्याचे इमारती कडेन बांदकाम खात्यान आडनदर केल्या, असो आरोप करून सगळ्या सरकारी इमारतीच्या सुरक्षा ओडीत करून दुरूस्ती काम हातांत घेवपाची मागणी केली.
विधानसभेत दिल्ले उत्तरांत बांदकाम खाते आनी सामान्य प्रशासन खात्यान स्पश्ट सांगला की 2019 त पणजेची समाज कल्याण इमारत ही धोकादायक म्हूण जाहीर केली. हे इमारतींत सुमार 250 अधिकारी कामांक आसतात. ते भायर येवजेणेचे पयशे मेळूंक नाशिल्ल्यान कितलेशेच दिव्यांग, जाण्टे, विधवा बायला हे कचेरेत भेट दितात. पूण, बांदकाम खात्यान बारीक दुरूस्तीचे काम सोडून कसलींच पावला उखलूंक ना, असो आरोप अमित पाटकार हांणी केलो.
माथानी साल्ढाणा प्रशासकीय इमारत, रवींद्र भवन मडगांव, पोरणी जीएमसी इमारत आनी मॅकनीझ पॅलेस कांपाल, बाल भवन कांपाल, जुन्ता हावस पणजी, विंगड विंगड सरकारी शाळेची इमारती, हॉस्पिसोयो हॉस्पिटल, पोरणी जीएमसी बिल्डींग रायबंदर हे इमारतींची स्थिती बाबत जाल्या अशी जाप भौशिक बांदकाम मंत्र्यान 2023 त विधानसभेच्या जापांत दिल्ली. पूण, सरकारान ही इमारती दुरूस्त करपाक कसलीच पावला उबारुंक नात ही दुर्दैवाची गजाल, असो आरोप पाटकार हांणी केला.
सरकार बेगीनूच हे इमारतींचे बांदकाम तशेंच सुरक्षा ऑडीट करचे आनी तांचे दुरूस्ती काम हातांत घेवचे. ना जाल्यार हाचे व्हडले आंदोलन काँग्रेस घडोवन हाडटले. काँग्रेसीचे आमदार विधानसभेत हे विशयाचेर आवाज काडून हो विशय लावन धरतले, अशे पाटकर हांणी बांदकाम खात्याच्या अधिकाऱ्यांक सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
