भांगरभूंय | प्रतिनिधी
दोनूय परीक्षां खातीर २६८ उमेदवारांची नोंदणी
पणजी : शालान्त मंडळा वतीन घेवपी गोंय शिक्षक पात्रता चाचणी (जीटीईटी) अंदूं २१ आनी २२ जुनाक जातली. हे परिक्षे खातीर वट्ट ३३९२ उमेदवारांनी नोंदणी केल्या. मुळाव्या पांवड्यार परीक्षे खातीर ९१९ जाल्यार माध्यमीक/उच्च मुळाव्या पांवड्यावेले परीक्षे खातीर २२०५ उमेदवारांनी नोंदणी केल्या. तशेंच दोनूय परिक्षांक २६८ विद्यार्थी बसतले. शालान्त मंडळाचे अध्यक्ष भगिरथ शेट्ये हांणी ही म्हायती दिली.
परीक्षेचे ऍडमीट कार्ड उमेदवारांक इमेलाचेर धाडलां. आदले परस अंदूं जीटीईटी परीक्षेक बसपी उमेदवारांचो आंकडो चड आसा. शिक्षण हक्क कायदो लागू जाले उपरांत पयली ते आठवी मेरेनच्या शिक्षकांक शिक्षक पात्रताय चाचणी पास जावप गरजेचें. हाका लागून नवे भरती केल्ल्या आनी पयली ते आठवे मेरेन अध्यापन करपी शिक्षकांक ही परीक्षा पास जावपाची अट आसा. तशेंच शिक्षक पदा खातीर अर्ज करप्यांकूय पात्रता निकशांत हे परिक्षेचो आसपाव आसा. कर्मचारी भरती आयोगा वरवीं आतां शिक्षकांची ११८ पदां भरतले. ही परीक्षा जुनांत जावपाची आशिल्ल्यान शिक्षकां खातीर अर्ज करपाची मुजत १५ जुलय मेरेन वाडयल्या.
जीटीईटी पयल्या पेपरा खातीर (पयली ते पांचवी मेरेनच्या शिक्षकां खातीर) उण्यात उणी बारावी पास आनी डी. एड. ही पात्रताय आसा. दुसर्या पेपरा खातीर (सवी ते आठवी मेरेनच्या शिक्षकां खातीर) उण्यांत उणें पदवीधर आनी डी. एड. पास ही अट आसा. बी. एड. धारकूय हे परिक्षेक बसपाक पात्र आसात. दोनूय पेपर १५० गुणांचे आसतले आनी पेपराची वेळ अडेज वरांची आसतली, अशें मंडळान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
