भांगरभूंय | प्रतिनिधी
पणजी : फाटलीं कांय वर्सां राज्य सरकारान न्यायदाना कडेन संबंदीत खात्यांचें आधुनिकीकरण केलें. पुलीस, अभियोग, न्यायपालिका खात्यांत नवीन तंत्रज्ञान हाडलां. हाचो एक भाग म्हणून
वेर्णाच्या आधुनीक फॉरेन्सीक लॅबाचें बेगीनूच उक्तावण करतले. ह्या सगल्या खातीर गुन्यांवांचो तपास आनी न्यायदानाची प्रकिया वेगान जातली अशें मुख्यमंत्री डॉ. प्रमोद सावंत हांणी सांगलें. शुक्रारा तांणी कला अकादमींत भारतीय न्याय संहिते विशीं आयोजीत केल्ल्या प्रदर्शनाक भेट दिली.
आमी पुलीस खात्याक नवें तंत्रज्ञान दिवपा वांगडा मुळावी सुविधाय वाडयल्या. फॉरेन्सीक विभागाक नवीं उपकरणां दिल्यांत. अभियोग खात्याच्या कार्यालया खातीर हालींच नवी सुवात उपलब्ध करून दिल्या. ह्या सगल्या गजालींक लागून खटल्यांचो बेगीनूच निकाल लागतलो अशी अपेक्षा आसा. हांगच्या प्रदर्शनांत गुन्यांवा पसून ते न्यायालयीन निवाड्यां मेरेनचे म्हायतीचें प्रदर्शन भरतले. सामान्य जनते सयत विद्यार्थ्यांनी हें प्रदर्शन नक्की पळोवचें. हाका लागून तांचे म्हायतींत भर पडटली, अशें मुख्यमंत्र्यान म्हणलें.
प्रदर्शनांत फॉरेस्नीक विभागाचें काम कशें चलता हाची म्हायती दिल्या. येवपी काळांत विद्यार्थ्यांक ह्या क्षेत्रांत व्हड संद उपलब्ध जातली. प्रधानमंत्री नरेंद्र मोदी आनी गृह मंत्री अमित शाह हांकां लागून देशांतली आदली कायदो संहिता वचून नवीन आयल्या. वसणूकवादी दुश्टीकोनांतल्यान तयार केल्ले कायदे वचून सध्याच्या काळा प्रमाण नवे कायदे हाडल्यात. भारतीय न्याय संहितेची अंमलबजावणी सगल्यांत पयलीं गोंयांत जाली ही आमचे खातीर अभिमानाची गजाल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
