भांगरभूंय | प्रतिनिधी
भाताचें शेत, सामुदायीक शेतां खातीर अर्थसंकल्पांत व्हड तजवीज
पणजी : राज्यांतली १८ हजार हॅक्टर खाजन शेतां पडींग आसा. खाजन शेतां तशेंच हेर पडींग शेतां लागवडी खाला येवची म्हूण येवपी अर्थसंकल्पांत शेतां तशेंच सामुदायीक शेतां खातीर व्हड तजवीज आसतली, अशें मुख्यमंत्री डॉ. प्रमोद सावंत हांणी सांगलां. शेत जमनीचेर कोयर ओडपो सयत स्क्रॅप यार्ड करपाचेर बंदी येतली, अशें मुख्यमंत्र्यांनी सांगलें.
सुर्ला – सांखळे सामुदायीक शेती प्रकल्पाचें मुख्यमंत्री डॉ. प्रमोद सावंत हांचे हस्तुकीं उक्तावण जालें. ह्या वेळार प्रगतशील शेतकारांक आत्मा पुरस्कारांचें वाटप जालें. कार्यावळीक शेतकी संचालक संदीप फळदेसाय, जिल्लो पंचायत वांगडी सुंदर नायक तशेंच थळावे लोकप्रतिनिधी हाजीर आशिल्ले. विवीध वाठारातले शेतकार हे कार्यावळीक हाजीर आशिल्ले.
बाजारांत वोचून बेळगांवच्यान येवपी भाजी घेवपाची सगळ्यांक संवय जाल्या. गोंयकारांनी भाजी व्हड प्रमाणांत पिकयली जाल्यार ही संवय मोडपाक वेळ लागचो ना. बेळगांवां परस गोंयच्या भाजयेचो दर्जो बरो आसा. सगल्याक दुदयाची वेल जाता मात आमकां दुदयाचीं कापां खावपाक नाका, बटाट्याचीं कापां खावपाक जाय. बटाट्या परस दुदी हो भलायके खातीर बरो आसता. तरणाटे लेगीत आतां शेतांत देवपाक लागल्यात. शेती तशेंच बागायतीचें प्रमाण वाडपाक लागिल्ल्यान २०३७ मेरेन दूद, शेती आनी भाजयेंत गोंय हे स्वयंपूर्ण जातलें. पर्यटन, खण ह्या वेवसाया इतलोच शेती हो गोंयकारांचो वेवसाय आसा. शेती लेगीत व्हडा प्रमाणात लावकारी जाव येता, हे वरद सामंत हांणी सिद्द केलां. फाटल्या ६ वर्सांत वरद सामंत हांची येणावळ १ कोटी ८० लाख रूपया आसा. दरेकी म्हालांत वरद सामंत हांचे सारके शेतकार तयार जावपाची गरज आसा.
कांय शेतकार शेत जमीन पडींग दवरून ती कोयर उडोवपा खातीर दितात. कोयराक लागून शेत जमिनीचें लुकसाण जाता. शेत करप शक्य नासलें जाल्यार सामुदायिक शेता खातीर जमीन दियात. हाचे खातीर कबलात करप शक्य आसा. शेत जमनीचो कोयरा खातीर वापर वा भंगार अड्डो करपाचेर बंदी आसतली. खाजन तशेंच हेर शेतां व्हडा प्रमाणात पडींग आसात. हाका लागून सामुदायीक शेतीक वाव आसा. हातुंतल्यान रोजगार उपलब्ध जावपा सयत भाजी, शेती हातूंत गोंय स्वयंपूर्ण जावप शक्य आसा, अशें मुख्यमंत्री डॉ. प्रमोद सावंत हांणी सांगलें.
कार्यावळींत बरो वावर केल्ल्या शेतकारांचो पुरस्कार दिवन भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
