भांगरभूंय | प्रतिनिधी
नवी दिल्ली, खबरां संस्था: राज्यसभा पोटवेंचणुकेंत १२ उमेदवारांतले ११ उमेदवार विरोधा विणें वेंचून आयले आनी भाजपाचे ८ उमेदवार जाल्यार ‘रालोआ’च्या दोन घटक पक्षांतल्यान दरेकी एक उमेदवार जिखले. तशेंच कॉंग्रेसीक एक सुवात मेळपाक येस आयलें. त्रिपुरांतल्या एका जाग्या खातीर ३ सप्टेंबराक मतदान जातलें.
ह्या निकालाक लागून भाजपाचो आंकडो ९५ जाला, जाल्यार रालोआचो ११२ जाला. राज्यसभेंतल्या २४५ जाग्यां मदीं जम्मू-काश्मीरांत आनी नियुक्त दरेकी चार अश्यो ८ सुवातो रित्यो आसात. देखून सध्या वरीश्ठ सभाघरांत वांगड्यांचो आंकडो २३७ आसा आनी भोवमत मेळोवपा खातीर ११९ वांगड्यांची गरज आसा. ‘रालोआ’क स नेमिल्ले वांगडी आनी एका अपक्षाचें फाटबळ आशिल्ल्यान ‘एनडीए’चो वट्ट आंकडो ११९ जाला. त्रिपुराक जैतिवंत जाले उपरांत हो आंकडो १२०चेर पावतलो. ताका लागून राज्यसभेंत ‘रालोआ’क पुराय भोवमत मेळ्ळां.
लोकसभा वेंचुकेंत राज्यसभेंतले धा वांगडी जिखिल्ल्यान ह्यो सुवातो रिकाम्यो जाल्ल्यो. तशेंच, बिजू जनता दळांतल्यान भाजपांत प्रवेश केल्या उपरांत ममता मोहंता हांणी राजिनामो दिल्लो. तेलंगणांत के. केशवराव हांची सुवातूय रिती जाल्ली.
वेंचून आयिल्ल्या भाजपच्या उमेदवारां मदीं आसामच्यान मिशन रंजन दास आनी रामेश्वर तेली, बिहारच्यान मनन कुमार मिश्रा, हरियाणांतल्यान किरण चौधरी आनी मध्य प्रदेशमधून केंद्रीय मंत्री जॉर्ज कुरियन, ओडिशातील ममता मोहंता, राजस्थानांतल्यान रवनीत सिंग बिट्टू, महाराष्ट्रांतल्यान धैर्यशील पाटील हांचो आसपाव आसा. ३ सप्टेंबराक जावपी मतदाना उपरांत त्रिपुरांतल्यान आंकड्यांच्या आदारार राजीव भट्टाचार्य हांकां जैत मेळपाची शक्यताय आसा. भाजपच्या इश्ट पक्षां मदले राष्ट्रवादी अजित पवार गटाचे नितीन पाटील महाराष्ट्रांतल्यान जैतिवंत जाले. जाल्यार ‘आरएलएम’चे उपेंद्र कुशवाह हांणी बिहारांतल्यान एक सुवात मेळयली.
‘इंडिया’चो आंकडो ८५
कॉंग्रेसचे ज्येश्ट फुडारी ज्येश्ट वकील अभिषेक मनु सिंघवी तेलंगणांतल्यान वेंचून आयले. वरीश्ट सभाघरांत कॉंग्रेसीचो आंकडो २७ जाल्यार ‘इंडिया’चो आंकडो ८५ जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
