भांगरभूंय | प्रतिनिधी
नवी दिल्ली, खबरां संस्था ः
लोकसभेची वेंचणूक जाली आनी सगळ्यांत चड खासदार आशिल्लें एनडीए सरकार सत्तेर आयलें. लोकसभेंत भोवमत मेळोवपाचो यत्न करपी राजकी पक्षूय राज्यसभेंत भोवमत मेळोवपाचो यत्न करतात. पूण लोकसभा खासदार व्हडलो काय राज्यसभा खासदार असो प्रस्न जायत्या जाणांक पडटा. तशेंच लोकसभेच्या खासदाराक चड अधिकार आसात काय राज्यसभेच्या खासदाराक असो प्रस्नूय पडटा.
लोकसभा आनी राज्यसभेंतल्या खासदारांक कितलो पगार मेळटा तें जाणून घेवया. तशेंच ह्या दोनाय खासदारांक खंयचे अधिकार आसात तेंय पळोवया.
लोकसभा खासदाराचो पगार कितलो?
लोकसभा खासदाराचो मुळावो पगार म्हयन्याक एक लाख रुपया आसता. हाचे भायर खासदारांक तरातरांचे भत्तेय दितात. जातूंत दिसाक २ हजार रुपया भत्तो, म्हयन्याक ७० हजार रुपया वेंचणुकेचो भत्तो, म्हयन्याक ६० हजार रुपया कार्यालयीन भत्तो आनी दूरध्वनी, घर, उदक, वीज, पेन्शन, प्रवास भत्तो अश्या सुविधांचो आसपाव जाता.
लोकसभेच्या खासदारांचे अधिकार कितें?
लोकसभा खासदारांच्या अधिकारा विशीं उलयतना तांकां मुखेलपणान तीन अधिकार आसात. तातूंतलो पयलो म्हळ्यार संसदेंत प्रस्तावीत केल्ल्या कायद्याचेर मतदानाचो अधिकार. दुसरें म्हणल्यार संसदेंतल्या वादांत वांटो घेवपाचो अधिकार आनी तिसरो म्हणल्यार सरकाराच्या वावरा संबंदी प्रस्न विचारपाचो अधिकार.
खासदारांच्या वावराचेर उलयतना कायदे करप, सरकाराच्या वावराचेर नदर दवरप, भौशीक प्रस्नांचेर आवाज काडप, सरकाराक सल्लो दिवप आनी आंतरराष्ट्रीय वेव्हारा संबंदीत चर्चांनी वांटो घेवप हें लोकसभा खासदारांचें काम.
राज्यसभा खासदाराचो पगार कितलो?
राज्यसभा खासदारांच्या पगाराची गजाल म्हणल्यार तांकां म्हयन्याक २ लाख १० हजार रुपया मेळटात. हातूंतले २० हजार रुपया ऑफिस खर्चा खातीर आसात. जाल्यार मुळावो पगार म्हणल्यार १ लाख ९० हजार रुपया आसता. पूण तातूंत जायत्या तरांचो भत्तोय आस्पावता.
राज्यसभेच्या खासदारांचे अधिकार कितें?
राज्यसभा खासदारांच्या अधिकारां विशीं उलयतना लोकसभा खासदारां भशेन राज्यसभा खासदारांक जायते तरेचे हक्क मेळ्ळ्यात. संविधान दुरुस्तीचे अधिकार, कार्यकारी अधिकार, अर्थीक अधिकार आनी विविध तरेचे अधिकारा मेळ्ळ्यात.
हाचे भायर राज्यसभा खासदारांक दोन खाशेले अधिकार मेळ्ळ्यात, जे लोकसभा खासदारांक नात. हातूंत संविधानाच्या कलम २९४ खाला पयलो हक्क दिला. राज्यसभेंत हाजीर आशिल्ल्या आनी मतदान करपी खासदारांच्या दोन तृतियांश भोवमतान राज्य वळेरेंतल्या खंयच्याय विशयाक राश्ट्रीय म्हत्वाचो विशय म्हूण जाहीर करूं येता. अशा प्रस्तावाक राज्यसभेन मान्यताय मेळ्ळी जाल्यार संसद ह्या विशयाचेर कायदो करपाक शकता.
दुसरो अधिकार संविधानाच्या कलम ३१२ खाला दिला. हाचे प्रमाण राज्यसभा दोन तृतियांश भोवमतान थाराव करून केंद्र सरकाराक नवी अखिल भारतीय सेवा स्थापन करपाक अधिकार दिवंक शकता. लोकसभा हें करपाक शकना. हाचे भायर राज्यसभेन अशा प्रस्तावाक मान्यताय दिले बगर संसद वा भारत सरकार कसलीच नवी अखिल भारतीय सेवा तयार करूंक शकना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
