राज्यपाल श्रीधरन पिल्लय हांच्या पुस्तकाचें  प्रकाशन

भांगरभूंय | प्रतिनिधी

भांगरभूंय । खबरां मेज
पणजीः राज्यपाल पी एस श्रीधरन पिल्लय हांच्या “मूलभूत बांदावळ आनी प्रजासत्ताक” ह्या पुस्तकाचें प्रकाशन मंगळारा  चंगनाचेरी, केरळचे मुख्य बिशप जोसेफ पेरुमथोत्तम हांच्या हस्तुकीं आनी उदकास्त्रोत मंत्री  सुभाष शिरोडकर हांच्या विशेश उपस्थितीत जालें.  राजभवनाच्या पोरण्या दरबार हॉलांत आयोजीत पुस्तक प्रकाशन कार्यक्रमाक राज्यसभा खासदार श्री. सदानंद तानावडे आनी गोंय विद्यापीठाचे कुलगुरू हरिलाल मेनन उपस्थित आशिल्लें.
ह्या वेळार उलयताना राज्यपाल श्री पी एस श्रीधरन पिल्लई हांणी सांगलें, रामायण आनी महाभारतांतल्यान आमकां  ‘यतो धर्मस्ततो जयः’ म्हणल्यार जंय धर्म आसा थंय जैत आसा, हाची शिकवण मेळटा आनी  हे सर्वोच्च न्यायालयाचे ब्रीदवाक्य आसा. धर्म हो खंयच्याय धर्मापुरतो मर्यादीत नासता.  पुस्तकाविशीं म्हायती दितना राज्यपालांनी सांगलें,  की मूलभूत बांदावळ आनी प्रजासत्ताक पुस्तकात भांगरा महोत्सवी भाशणांचो आनी विशेश करून  केशवानंद भारती आड संन्यासी प्रकरणाचो आसपाव आसा, जाचो निकाल 13 न्यायाधीशांच्या खंडपीठान  दिलो आनी ह्या निर्णयाची  सुनावणी 66 दीस चल्ली.
 बिशप जोसेफ पेरुमथोट्टम हांणी आपल्या उलोवपात सांगलें, आमी सगळें भारतीय संविधानाचेर विश्वास दवरतात, जी आमची  मूलभूत बंदावळ आसा आनी  ती आमकां भारताचे अभिमानी नागरिक म्हणून सामर्थ्य आनी आत्मविश्वास दिता. देशाक भारतीय संविधानाचो आदर आनी संरक्षण करपी राजकीय आनी सामाजीक अशा दोनीय नेत्यांची गरज आसा. घटनेच्या कलम 142 चो उल्लेख करतना बिशप जोसेफ पेरुमथोट्टम हांणी सांगलें, की “पुराय न्याय” करपा खातीर संविधानान देशातल्या सर्वोच्च न्यायालयाक अधिकार दिल्ले आसात, अशें जोसेफ पेरुमथोट्टम हांणी सांगलें.
मंत्री सुभाष शिरोडकर हांणी राज्यपालांच्या कामाची तोखणाय करून राजभनातल्यान जावपी कार्याचो फायदो समाजातल्या गरजू लोकांक जाता, अशें सांगलें. मूलभूत बांदावळ आनी  प्रजासत्ताक ह्या पुस्तकातल्या  विचारांनी आपल्याक  धर्माचो उगडास करून दिलो, जो आपणे महाविद्यालयीन जीणेत राजा समुद्र गुप्त आनी राजा अशोक हांच्या बाबतीत वाचलेलो.  छत्रपती शिवाजी महाराजांच्या कारभारातय  तेच दिसून येता, अशेंय तांणी सांगलें.  खासदार  सदानंद तानावडे, गोंय विद्यापीठाचे कुलगुरू हरिलाल मेनन हांचेय ह्या वेळार उलोवप जालें