भांगरभूंय | प्रतिनिधी
म्हापशें: राज्यपाल निधींतल्यान फाटल्या साडेतीन वर्सांत गोंयांतले गरजेवंत लोक आनी दुयेंती खातीर स कोटी रुपयांची अर्थीक मजत आपणे वितरीत केल्या अशी म्हायती राज्यपाल पीएस श्रीधरन पिल्लई हांणी दिली.
काल (सोमारा) खोर्ली, म्हापश्यां मातृछाया संस्थेक भेट दिले उपरांत ते उलयताले. ह्या वेळार उपसभापती ज्योशुआ डिसोझा, नगराध्यक्षा प्रिया मिशाळ, मातृछायाचे राजीव नेवगी, मधुकर दीक्षित आनी अनूप केणी हाजीर आशिल्ले.
ह्या वेळार राज्यपालांचे हस्तुकीं म्हापशेंच्या मातृछाया तशेंच सिनियर क्रिस्टोबेल्स ट्रस्ट, मदर तेरेझा रोझेस (चलयांचें गृह) हांकां दरेकी एक लाख रुपयांचो धनादेश संबंदीत संस्थांच्या प्रतिनिधीं कडेन भेटयलो. राज्यपालांनी मातृछाया आनी उपरांत मदर तेरेझा रोझेस हे संस्थेक भेट दिली.
राज्यपाल पिल्लई हांणी म्हणलें. गरीब आनी गरजू लोकां खातीर कितें तरी बरें करप म्हणल्यार देवा खातीर कितें करपा सारकें आसा. अस्तंती देश हे चडांत चड देवाचेर विस्वास दवरिनात. हें 2021 चे जनगणेंतल्यान मुखार आयलां. हातूंत अमेरिका (60 टक्के), युके (43 टक्के), जपान (60 टक्के), चीन (79 टक्के), फ्रान्स (21 टक्के) हांचो आस्पाव आशिल्लो. जाल्यार भारतांत ही टक्केवारी खूबच उणी म्हणल्यार 22 टक्के आसा. हाचोच अर्थ आमी ह्या धर्मा कडेन आनी देवदेवतां कडेन अंर्तमनान जोडल्यात. लोकांची देवाचेर खूब श्रद्धा आनी विस्वास आसा. ही खुबूच सकारात्मक आनी बरी गजाल आसा.
राज्यपाल निधींतल्यान फुडल्या सप्तकांत आनीक 34 दुयेंतींक अर्थीक मजत भेटयतले. राज्यपाल, लोकप्रतिनिधी श्रेश्ठ नासतात. जाल्यार लोक सर्वोच्च आसतात. ताका लागून लोकां खातीर काम करप हें सगल्या लोकप्रतिनिधींचें अर्धकर्तव्य आसता.
गोंय राजभवनान फाटल्या साडेतीन वर्सांत दोन हजार दुयेंती तशेंच गरजू, संस्थांक अर्थीक मजत उपलब्ध करून दिल्या. राजभवन सेगीत लोककल्याणकारी उपक्रम आसून खंयच्याय भेदभावा बगर निधीचो योग्य वापर करीत आशिल्ल्याचें राज्यपाल पिल्लई हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
