राज्यपाल आनी मुख्यमंत्र्यां कडल्यान स्वतंत्रताय दिसाचीं परबीं

भांगरभूंय | प्रतिनिधी

पणजी: राज्यपाल पी. एस. श्रीधरन पिल्लई हांणी गोंयकारांक भारतीय स्वतंत्रताय दिसाचीं परबीं भेटयल्यां. ते संदेशांत म्हणटा, भारतीय स्वतंत्रताय दिसाच्या ह्या उमेदीच्या प्रसंगार हांव परबीं भेटयतां.
15 ऑगस्ट हो भारतीयां खातीर अभिमानाचो दीस. हो खीण आमकां देशभक्तांक नमन करपाची आनी हुतात्म्यांक आर्गां ओपपाची संद दिता. ह्या म्हत्वाच्या प्रसंगार हांव किर्तवंत, ज्ञात- अज्ञात शुरवीरांक, जांणी स्वातंत्र्य मेळोवपाक जिणेचो त्याग केलो, तांकां काळजा सावन आर्गां ओपतां.
आयज आमी तिरंगो बावटो अभिमानान हुबयतना काळजांत देशभक्तीची ज्योत पेटोवया आनी देशाचे उदरगती खातीर योगदान दिवपाची प्रतिज्ञा करूया.
स्वतंत्रतायाचीं 75 वर्सां पुराय जाल्ले निमतान आमी ‘आजादी का अमृत महोत्सव’ मनयतात आनी मानादीक प्रधानमंत्र्यान 2047 मेरेन अमृत काळाची घोशणा केल्या आनी ह्या काळात भारत एक ग्लोबल लिडर म्हूण फुडें येतलो. गोंय राज्य केंद्र सरकाराच्या खुबश्या येवजण्यांची येसस्वी अंमलबजावणी करून फुडें वाटचाल करता. राज्य सरकार गोंयच्या लोकांच्या बर्‍या खातीर नेटान काम करता.
हांव सगळ्यां गोंयकारांक आनी भारतीयांक जात, पात आनी धर्म भेदभाव पयस करून एकठांय येवपाचो आनी राष्ट्राच्या कल्याणा खातीर काम करपाचो उलो मारतां. गरिबांचें सशक्तीकरण करून, शिक्षणाक उर्बा दिवन आनी आपलेपणाच्या संस्कृतीक पोसवण दिवन आमी बदलाचे शिल्पकार जावया, अशें राज्यपालान म्हणलें.

मुख्यमंत्र्या कडल्यान परबीं

मुख्यमंत्री डॉ. प्रमोद सावंत हांणी गोंयकारांक आनी देशाच्या समस्त नागरिकांक स्वतंत्रताय दिसाचीं परबीं भेटयल्यांत. ते आपल्या संदेशांत म्हणटात, 1947 वर्सा ह्याच दिसा भारताक स्वातंत्र्य मेळ्ळें. देशाच्या स्वातंत्र्या खातीर आपले जिणेचो त्याग केल्ल्या समेस्त स्वतंत्रताय सैनिकांक हांव नमन करतां.
देशान स्वतंत्रताये उपरांतच्या काळांत उदरगतीच्या मळांचेर नेटान उदरगत केल्या. आयज भारत संवसारांत नेटान उदरगत करपी एक राष्ट्र जावन आसा. केंद्र सरकारान समाजीक आनी साधनसुविधांच्या उदरगतीचे भर दिवन लोकांचे जिणेंत सुदारणा घडोवन हाडल्या. लोकांचो निर्धार आनी एकवटाक लागून हें शक्य जालां. दुबळ्या घटकांच्या सशक्तीकरणा खातीर केंद्र तशेंच राज्य सरकारान कल्याणकारी येवजण्यांची अंमलबजावणी केल्या. भारत देशाच्या स्वतंत्रताये खातीर जिणेचो त्याग केल्ल्या शुरवीरांच्या आत्म्यांक आमी नमन करूया आनी राष्ट्र आनी राज्याचे उदरगती खातीर कटीबद्द जावया, अशें मुख्यमंत्री संदेशांत म्हणटा.