राज्यपालाकडल्यान गोंयच्या लोकांक गोंय घटक राज्य दिसाचीं परबीं

भांगरभूंय | प्रतिनिधी

पणजी: गोंयचे राज्यपाल पी. एस. श्रीधरन पिल्लय हांणी गोंय घटक राज्य दिसा निमतान गोंयच्या लोकांक परबीं भेटयल्यां. राज्यपालान आपल्या संदेशांत म्हणलें, गोंय घटक राज्य दिसाच्या ह्या उमेदीच्या प्रसंगार हांव गोंयच्या प्रत्येक नागरिकांक म्हजी काळजासावन उर्बेभरीत परबीं. गोंय घटक राज्य दिसाचीं समेस्त गोंयकारांक परबीं अशें तांणी म्हणलां. 

30 मे 1987 दिसा गोंयचें केंद्र शासीत प्रदेशापसून भारतीय संघराज्यांत रूपांतर जालें. घटक राज्य दीस गोंयच्या किर्तवंत इतिहासांतलो उगडासाचो दीस जावन आसा. 1987 वर्सा ह्याच दिसा गोंय भारतीय संघराज्याचें 25 वें राज्य जालें. गोंयची स्वतंत्र आनी वेगळी वळख राखपा खातीर गोंयकारांनी आनी देशाच्या हेर वाठारांतल्या लोकांनी केल्ली चळवळ 30  मे 1987 दिसा येसस्वी जाली आनी त्या खातीर ह्या दिसाक इतिहासीक म्हत्व आसा.

ह्या उमेदीच्या वेळार आमी आमच्या राज्याचो फुडार घडोवपा खातीर अविश्राम योगदान दिल्ल्या गोंयकारांच्या उगडासाक आर्गां ओंपुया. तांणी आपलो श्रेश्ठताय, नाविन्य आनी आपुलकेचें दायज फुडें व्हरपा खातीर दाखयिल्ली दुरदृश्टी, त्याग आनी  चिकाटीचो आमी भोवमान  करूया.

गोंय राज्यान फाटल्या दशकांनी खासा करून शिक्षण, भलायकी, साधनसुविधाय अश्या म्हत्वाच्या मळार तोखणाय करपा सारकी उदरगत केल्या. गोंय हें शांतीकायेची भूंय आनी ही परंपरा सांबाळून दवरपाचें श्रेय गोंयचे जनतेक फावता. गोंयांत साबार आकर्शणां आसात. राष्ट्रीय उद्दीश्टां सयत राज्याक घटमूट लोकशाय परंपरेचें दायज लाभलां. संवसारभरांतल्या विंगड विंगड वाठारांतल्यान लोक हांगा सैमीक सोबितकाय आनी सांस्कृतीक दायजाची मजा घेवपाक येतात. आमी ह्या दायजाचो सांबाळ करून गोंयांत येवपी पर्यटकांचो राबितो खुशालभरीत आनी उगडासांत उरपा सारको करपाची गरज आसा. राज्यांत नैतीक तत्वांच्या आदाराचेर पर्यटन मळार उदरगत जातली हाची आमी खात्री करपाक जाय.

म्हाका सांगपाक खोशी जाता, की गोंय राज्यान साधनसुविधांच्या मळार म्हत्चाचे प्रकल्प उबारल्यात, देखीक मोपाचो संवसारीक दर्जाचो मनोहर आंतरराष्ट्रीय विमानतळ, जो सौर उर्जा प्रकल्प, पावसाच्या उदकाचो सांबाळ करपाचो प्रकल्प आनी आधुनीक सुविधा सयत सिव्हरेज प्रक्रिया प्रकल्प, 3-D Monolithic precast इमारत, दर्जेदार रस्ते, Robomatic hollow precast walls, 5G Compatible IT साधनसुविधायो अशा आधुनीक तंत्रज्ञानाच्या शाश्वत साधनसुविधांचे संकल्पनेचेर उबारला. जुवारी न्हंयेवयलो आठ लेनीचो नवो केबल स्टेड पूल हो आनीक एक म्हत्वाचो प्रकल्प जावन आसा. ह्या पुलाक लागून पणजी ते काणकोण मेरेनची येरादारी सुरळीत जावपाक मदत जाल्या.

तुमकां सगळ्यांक खबर आसा, देशांतल्या हेर राज्यांच्या तुळेन राज्याचे समाजीक-अर्थीक निर्देशांक खूब प्रभावी आसात. देशांत गोंयचे per capita income  सगळ्यांत चड आसा, जे बळकट आनी निरोगी अर्थवेवस्थेचें लक्षण आसा. FIFA U-17 बायलां संवसारीक फुटबॉल सर्त आयोजना खातीरच्या भारतांतल्या तीन सुवातां मदलें गोंय हे एक केंद्र आशिल्लें.

G20 शिखर परिशदेच्या कांय कार्यावळींचें आयोजन करपा खातीर गोंयची निवड जाल्या. जाची आमकां आमच्या राज्यांची समृध्द संस्कृती आनी सरबरायेची परंपरा दाखोवपाची संद मेळटली. देशांतले सगळ्यांत चड पसंदीचें थळ आशिल्ल्या राज्यांतले हे कार्यावळीक लागून राज्याची अर्थवेवस्÷था बरी चालीक लागतली. जाका लागून आंतरराष्ट्रीय माचयेर गोंयच्या उत्पादनांचे ब्रँडींग प्रदर्शीत करपाची संद मेळ्ळ्या. 

राज्यांत सुरू केल्ल्या आत्मनिर्भर भारत, स्वयंपूर्ण गोंय मोहिमेची देशांतल्या नामनेच्या व्यक्तिंकडल्यान तोखणाय जाल्या. देशांतल्या हेर राज्यांनी स्वयंपूर्ण गोंय मोहीम ही एक उत्कृश्ट कार्यावळ म्हणून अभ्यास केला, जो राज्यांचे उदरगती खातीर बरो उपक्रम जावन आसा. सर्वसंपन्न राज्य करप हो ह्या उपक्रमाचो उद्देश आसा.

रोजगार निर्माण करपा खातीर MSME येवजणेखाला गोंयांत पयल्या सागरी प्रकल्पाची स्थापन जाल्या. गोंयांत उद्देगीक गुंतवणूक आनी रोजगार निर्माण करपा खातीर प्रयत्न चालू आसात. तुयेंच्या इलेक्ट्रॉनीक, उद्देगीक पार्कांत उद्देग उबारपा खातीर प्रोत्साहन दिता.

धारगळ पेडणें हांगा आधुनीक आयुष हॉस्पिटल उबारून सरकारान राज्यांत आयुर्वेदाक प्रोत्साहन दिला.

हांगा हांव सांगपाक सोदता, की 15 जुलय 2021 दिसा हांवें गोंयचे राज्यपाल म्हूण पदभार स्विकारलो आनी त्या दिसा सावन हांवें समाजातल्या गरीब आनी गरजू लोकां मेरेन वचून तांच्यो समस्यां सोडोवपाचो यत्न करपाचे थारायिल्लें. राजभवन हे लोकभवन आशिल्ल्याचे सिध्द करपाखातीर हांवे आसरो घरां आनी वृद्धाश्रमांक भेट दिवन अर्थीक मदत भेटयली. थंय रावपी भुरगीं आनी जाण्ट्यांकडेन संवाद साधलो आनी तांकां राजभवनार येवपाचे निमंत्रण दिले. संवसारीक एड्स दिसा 40 एचआयव्ही बादीत भुरग्यांनी राजभवनार भेट दिली. अशा निश्पाप भुरग्यांविशीं कोणेंच भेदभाव करचो न्हय आनी तांकां समाजाकडल्यान मदत मेळची, ह्या उद्देशान हो उपक्रम आयोजीत केलो. अशां उपक्रमांतल्या राजभवन हे सामान्य लोकांच्या मदती खातीर उक्ते आशिल्ल्याचो संदेश दिलो.

गोंय ग्राम संपुर्ण यात्रा येसस्वीपणान पुराय केल्या उपरांत हांवें गोंयच्या पुरातन आनी पोरण्या झाडां संबंदी गोंय सैमीक दायज यात्रा सुरू केली. गोंयच्या साबार तालुक्यांनी आशिल्ल्या सुमार 31 दायज झाडांची म्हायती करून घेतली. ह्या झाडांकडेन थळाव्या समाजाचे धार्मिक आनी सांस्कृतीक नाते आशिल्ल्याचें आनी लोक ह्या झाडांची शेकड्यांनी वर्सां सावन पुजा आनी सांबाळ करतात हें पळोवक मेळ्ळें. सैम आनी पर्यावरणा सयत अशा झाडांचें म्हत्व लोक संस्कृती आनी सामाजीक जिणेकडेन जोडिल्ले आसा. तशेंच हांवें पर्यटकांचें आकर्शण आशिल्ल्या गोंयांतल्या जुव्यांक भेट दिवपाक सुरवात केल्या, जाका लागून हांवे थारायिल्लें प्रमाण गोंयची दायज झाडां,  वामन वृक्ष कला आनी गोंयची सोबीत जुवीं ह्या पुस्तकांतल्यान गोंयचे दायज, संस्कृती आनी परंपरा जगामुखार हाडून गोंय हें म्हत्वाचें पर्यटन थळ म्हूण फामाद करपाक मदत जाली.

तशेंच हांवें जे युवक आपलें पयलें पुस्तक कोंकणी, मराठी, संस्कृत आनी हिंदी भाशेंत प्रकाशित करपाक सोदतात, तांकां प्रोत्साहन दिवपा खातीर  नयी पहल नावान पुस्तक पुरस्कृत येवजण सुरू केल्या.

ह्या उमेदीच्या प्रसंगार आमी गोंयचो उत्साह आनी खुशालकाय मनोवया. गोंय हे ह्या फुडेंय सपनां साकार जावपाची सुवात जांव, जंय प्रत्येक नागरीक आपली तांक वळखुपाक सशक्त आसतलो आनी  लोकशाय, स्वातंत्र्य आनी न्यायवेवस्थेची मुल्यां घटमूट जातली. आमच्या पर्जळीत फुडारा खातीर आमी एकवटान यत्न करूया, जाका लागून गोंयची उदरगत, ज्ञान आनी सलोख्याचे आदर्श उदाहरण थारतले.

गोंय घटक राज्य दिसाच्या ह्या उमेदीच्या वेळार हांव परत एकदां गोंयच्या म्हज्या सगळ्या भावां-भयणांक परबीं भेटयतां, अशें राज्यपाल संदेशांत म्हणटा.

मुख्यमंत्र्याकडल्यान गोंयकारांक गोंय घटक राज्य दिसाचीं परबीं

मुख्यमंत्री डॉ. प्रमोद सावंत हांणी गोंयच्या लोकांक 36 व्या गोंय घटक राज्य दिसाचीं परबीं भेटयलीं.

मुख्यमंत्र्यान आपल्या संदेशांत, 1967 वर्सा जनमत कौलान घटक राज्याच्या दिकेन प्रवास सुरू जालो, जे वरवीं गोंयची वेगळी वळख राखपाचो निर्णय जालो, 30 मे हो गोंयच्या इतिहासातलो उगडासाचो दीस.  1987 वर्सा ह्याच दिसा गोंयांक घटक राज्याचो दर्जो मेळ्ळो आनी गोंय हें भारत देशाचे 25 राज्य जालें. गोंयकारांनी आपली वळख सांबाळपा खातीर केल्ले चळवळीक ह्या दिसा येस मेळ्ळे.

गोंय हें सैमीक सोबितकाय आनी सरबरायेची भूंय. गोंय राज्यान देशाचे उदरगती खातीर साबार मळार योगदान दिलां. आयज गोंय राज्यान लोकांच्या सहकार्यान आनी प्रकल्प-येवजणांवरवीं बरीच उदरगत केल्या.

घटक राज्याखातीर योगदान दिल्ले सगळे फुडारी, बुद्धीवान आनी गोंयच्या लोकांचो आयच्या ह्या इतिहासीक प्रसंगार आमी सगळ्यांनी उगडास करून तांकां नमन  करूया. राज्याची उदरगत करून स्वयंपूर्ण गोंय करपाचे नदरेन आमी कटीबध्द जावया, अशें मुख्यमंत्री आपल्या संदेशांत म्हणटा.

आयज गोमंत विभूशण पुरस्कार भेटयतले

गोंय घटक राज्य दिसा दोनापावला राजभवनाच्या दरबार हॉलांत आयोजीत सुवाळ्यांत लोककलेचे संशोधक विनायक खेडेकर हांकां 2019-20 वर्सा खातीरचो जाल्यार हिंदुस्तानी शास्त्रीय संगीत गायक  पं. प्रभाकर कारेकर हांकां 2020-21 वर्सा खातीरचो गोमंत विभूशण पुरस्कार भेटयतले.

मुख्यमंत्री डॉ. प्रमोद सावंत हांचे हस्तुकीं कला आनी संस्कृती मंत्री गोवींद गावडे, विरोधी पक्ष फुडारी युरी आलेमांव, मुखेल सचीव पुनीत कुमार गोयल, कला आनी संस्कृती सचीव मिनीनो डिसौजा आनी म्हायती आनी प्रसिध्दी सचीव सुभाष चंद्रा हांचे हाजेरींत पुरस्कार भेटयतले.

सकाळीं 11.10 वरांचेर विनायक खेडेकार  आनी पं. प्रभाकर कारेकर हांच्या कार्याचेर उजवाड घालपी फोटो प्रदर्शनाचें उक्तावण जातलें आनी त्या उपरांत तांचे जिणेचेर फिल्म प्रदर्शीत करतले.