भांगरभूंय | प्रतिनिधी
राजभवन अन्नधन येवजणेचें खासा कार्यावळींत उक्तावण
पणजी : राज्यपाल पी. एस. श्रीधरन पिल्लई हांणी राज्यांत विवीध उपक्रम सुरू केल्या. लोकांक मेळून ते विवीध समस्या जाणन घेतात. सरकार वा प्रशासनांत कांय उणाव जाणवल्यार तांणी तें सरकाराच्या कानार घालचें. सरकारांतले वा प्रशासनांतले उणाव पयस करपाक कटीबद्ध आसा, अशें मुख्यमंत्री डॉ. प्रमोद सावंत हांणी म्हणलें.
राजभवनांत आयतारा अन्नधन येवजणेचें उक्तावण जालें. तशेंच कॅन्सर आनी डायलीसीसी दुयेतींक मजतूय वाटली ह्या वेळार मुख्यमंत्री उलयताले. कार्यावळीक केरळचे राज्यपाल राजेंद्र आर्लेकार, विद्यापीठाचे कुलगुरू प्रा. हरिलाल मेनन हजर आशिल्ले. विवीध पुस्तकांच्या विक्रेंतल्यान राज्यपाल पिल्लई हांकां रॉयल्टी मेळ्ळ्या, ती ते अन्नदाना खातीर विवीध संस्थान दितले.
राज्यपाल पिल्लई यानी इतिहास आनी देवळांचेर आधारीत विवीध भाशेंतल्यान पुस्तकां बरयल्यांत. गोंयच्या देवळांचेरूय तांणी पुस्तकां बरयल्यांत. तांचीं पुस्तकां विद्यार्थी तशेंच अभ्यासकांक मार्गदर्शक थारतलीं. विवीध उपक्रमा खाला राज्यपाल गोंयचीं देवळां तशेंच जनतेक मेळटात. जनतेक मेळून तांच्यो समस्या जाणून घेवपी ते पयले राज्यपाल. पुस्तकांतल्यान जी रॉयल्टी तांकां मेळ्ळ्या तीय ते समाजकार्यांत खर्च करतले. तांचें हें काम तोखणायेचें अशें मुख्यमंत्री डॉ. सावंत हांणी म्हणलें.
डायलीसीस आनी कॅन्सराचे दुयेंती राज्यांत वाडत आसात. रोगां पसून राखण करपा खातीर लोकांनी योग्य तरेन आचरण आनी योग्य आहार घेवपाची गरज आसा. डायलिसीस आनी कॅन्सराचो वाडपी आंकडो धोको निर्माण करपी आसा, अशें मुख्यमंत्र्यान म्हणलें.
राज्यपाल जनतेचे आसपाक जाय : राजेंद्र आर्लेकार
राज्यपाल हे राजभवनाचे आसचे न्हय जनतेचे आसपाक जाय. राज्यपाल पिल्लई हे लोकांक मेळून तांच्यो समस्या जाणून घेतात. तशेंच ते विवीध उपक्रम राबयतात. खर्या अर्थान ते जनतेचे राज्यपाल जाल्यात. तांच्या कार्याचें अनुकरण हेर राज्यपालूय करपाक लागल्यात, अशें केरळचे राज्यपाल राजेंद्र आर्लेकार हांणी म्हणलें.
राज्यपाल पिल्लई हांचें अध्यक्षीय भाशण ह्या वेळार जालें. पुस्तकांच्या रॉयल्टींतल्यान जमा जाल्ली रक्कम हे येवजणे खातीर हांव खर्च करतलों. ही रक्कम तीन म्हयन्यां खातीर पावपाक शकता. उपरांत गोंय सरकारान ही येवजण मुखार हरपा खातीर गरजेची तरतूद करपाक जाय. ही घडणूक सर्वोच्च आसा, अशें हालींच सरन्यायाधीशान म्हणलां. म्हटले आहे. घटनेत ‘वी द पीपल..’ असो उल्लेख आसा. घटना सर्वोच्च आसा, हाचो अर्थ आमी लोक सर्वोच्च आसात, असो जाता अशें राज्यपाल पिल्लई हांणी अध्यक्षीय भाशणांत म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
