भांगरभूंय | प्रतिनिधी
पणजीः राज्यपाल पी. एस. श्रीधरन पिल्लई हांचे सयत श्रीमती एस. रीता श्रीधरन पिल्लई हांणी काल फोंडें म्हालांतल्या श्रीसिद्धनाथ पर्वत, बोरी हांगा भेट दिली. उदका संसाधन मंत्री सुभाष शिरोडकार हांणी राज्यपालाक येवकार दिलो. ह्या वेळार श्याम प्रभू देसाय, अध्यक्ष श्रीनवदुर्गा देवस्थान, सरपंच जयेश नायक आनी हेर मानेस्त हजर आशिल्ले.
सिद्धनाथ पर्वताचेर आशिल्ल्या श्रीसिद्धनाथ देवस्थानांत प्रार्थना केले उपरांत राज्यपालांनी सिध्देश्वर पर्वताची पळोवणी केली. ह्या वेळार नामनेचे इतिहासकार संजीव सरदेसाय हांणी सिध्देश्वर पर्वत आनी देवळाचो इतिहास आनी हेर म्हायती राज्यपालांक दिली.
हाचे आदीं राज्यपालांनी बोरींतल्या श्रीनवदुर्गा देवस्थानाक भेट दिवन थंय नवदुर्गा देवीची प्रार्थना केली. ते उपरांत तांणी श्रीकमळेश्वर देवळाक भेट दिली.
ह्या वेळार तांचे वांगडा एम. आर. एम. राव, आयएएस, राज्यपालाचे सचीव, संजीव सी. गांवस देसाय, आनी राज्यपालांचे सचीव आनी खाशेले अधिकारी मिहीर वर्धन हजर आशिल्ले.
गोंयांतल्या वेंचून काडिल्ल्या दोंगरांक भेट दिवपाची आपणाक खूब इत्सा आसा. सैमा विशीं आकर्शण आनी हुस्को आशिल्ल्याची म्हायती राज्यपालांनी दिली. बेगिनूच आपूण हेर वाठारांतल्या दोंगरांक भेट दितलो, अशें तांणी सांगलें.
फुडें उलयतना तांणी सांगलें, गोंयांत गिरेस्त दायज आनी संस्कृताय आसा. अशा दोंगरांच्या भेटीचेर आदारीत राजभवन पुस्तकाच्या रुपांत एक खाशेली आवृत्ती उजवाडायतले. तशेंच, आपल्या नव्या पुस्तकांत इतिहासीक, सांस्कृतीक आनी पर्यावरणीय दिश्टीकोण प्रतिबिंबीत जातलो, असोय उल्लेख राज्यपालांनी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
