भांगरभूंय | प्रतिनिधी
भांगरभूंय । प्रतिनिधी
माशेलः कुडचड्याच्या प्रांशी रॉयल्स पंगडान सांकवाळच्या तुवी क्रिकेटर्सांक 7 विकेटींन हारोवन राजेश फळदेसाय करंड अखील गोंय पंचायत आनी पालिका पांवड्या वयले क्रिकेट सर्तींत वस्तादपण मेळयलें. कुमारजुवेंच्या मळावाडो हांगच्या फिलोमिनो डिसा मैदानार जाल्ले हे सर्तींत 36 पंगडांनी वांटो घेतिल्लो. पयलीं खेळून तुवी क्रिकेटर्सांनी 5 ओव्हरींत 55 दांवड्यो केल्यो. तांच्या दीपकान सगल्यांत चड 25 धांवड्यो केल्यो. जैता खातीर जाय आशिल्ल्यो 56 धांवड्यो प्रांशीन 3 गडी वोगडावन केल्यो. तांच्या विकासान सगल्यांत चड 26 धांवड्यो केल्यो.
जैतिवंत प्रांशी रॉयल्साक 2.50 लाख रुपयाचें पयलें इनाम, तुवी क्रिकेटर्सांक 1.25 लाख रुपयांचें इनाम फावो जालें. उपांत्य मॅचींत हारल्ल्या काणकाच्या भूमिका 11 आनी मयेंच्या मोती ब्रदर्सांक दरेकी 40 हजारांची इनामां दिलीं. पुष्पशील हाका मॅन ऑफ दी सिरीज, संजयाक बरो बॅट्समन आनी संदेशाक बॉलर म्हणून भोवमानीत केलें.
इनाम भेटवण कार्यावळीक सभापती रशेश तवडकार, पर्यटन मंत्री रोहन खवंटे, समाज कल्याण मंत्री सुभाष फळदेसाय, मुरगावचो आमदार संकल्प आमोणकार, मयांचो आमदार प्रेमेंद्र शेट, कुमारजुंवेचो आमदार राजेश फळदेसाय, कुमारजुवेचो सरपंच नंदकुमार शेट हाजीर आशिल्ले. सर्त प्रायोजीत केल्ले खातीर प्रशांत भंडारी हाणे राजेश फळदेसायाचे उपकार मानले. तवडकार आनी सुभाष फळदेसायानआयोजकांची तोखणाय केली. कुमारजुव्यांत फ्लॅडलायट क्रिकेट सर्त आयोजीत करची अशें दिसतालें. राजेश फळदेसाय हाचे कडेन आमची इत्सा सांगतगीर तांणी सर्ती आयोजीत करपाचें वजें आपल्या भुजार घेतलें आनी ती येसस्वी करून दाखयली अशें भंडारीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
