भांगरभूंय | प्रतिनिधी
पणजी : बिहारचे राज्यपाल राजेंद्र आर्लेकार हांची आतां केरळाचे राज्यपाल म्हूण नेमणूक जाल्या. हेर राज्यपालांच्या नेमणुके सयत राजेंद्र आर्लेकार हांची केरळच्या राज्यपालपदाचेर नेमणूक जाल्ल्याचो आदेश राष्ट्रपती द्रौपदी मुर्मू हांणी जारी केला.
केरळचे राज्यपाल म्हूण बदली जाल्ल्यान म्हाका खोशी आसा. केरळांतले मनीस गोंयचो राज्यपाल आनी गोंयचो मनीस केरळचो राज्यपाल असो योगायोग निर्माण जाला. केरळात सीपीएमचें सरकार आसले तरी घटनात्मक नदरेन ते राज्यपालांचें सरकार आसतले. ते निमतान म्हाका केरळांत वावर करपाची संद मेळटली, अशें राज्यपाल राजेंद्र आर्लेकार हांणी बदली उपरांत सांगलें. केरळचे राज्यपाल अरीफ मोहम्मद खान हांची बिहारचे राज्यपाल म्हूण नेमणूक जाल्या.
आदले केंद्रीय गृह सचीव अजय कुमार भल्ला हांची मणीपूर राज्यपाल म्हूण नेमणूक जाल्या. आदले सैन्य दळाचे मुखेली विजय कुमार सिंग हे मिझोरामचे राज्यपाल जाल्या. डॉ. हरी बाबू कंभमपती हांची ओडिशाचे राज्यपाल म्हूण नेमणूक जाल्या. ते पयली मिझोरामचे राज्यपाल आशिल्ले.
राजेंद्र आर्लेकार हे सगळ्यांत पयली हिमाचल प्रदेशाचे राज्यपाल जाले. उपरांत तांची नेमणूक बिहारच्या राज्यपालपदाचेर जाली. आतां ते केरळचे राज्यपाल जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
