भांगरभूंय | प्रतिनिधी
पणजी : आदले प्रधानमंत्री राजीव गांधी हांच्या कार्यकाळांत कोंकणी भाशेक आठव्या परिशिश्टांत सुवात मेळिल्ली. एका अर्थान तांणी गोंयची स्वतंत्र अस्मिताय कायम दवदल्या अशें कॉंग्रेस प्रदेशाध्यक्ष अमित पाटकार हांणी सांगलें.
तांणी मुखार सांगलें, राजीव गांधी हांकां गोंयां विशीं विशेश आपुलकी आशिल्ली. तांच्या कार्यकाळांतूच गोंयांक स्वतंत्र राज्याचो दर्जो मेळ्ळो. गोंयकारांनी अश्या म्हान व्यक्तींचो उगडास कायम दवरप गरजेचें. तरणाट्यांनी तांचो आदर्श घेवन मुखार सरचें. राजीव गांधी हे तंत्रज्ञानाच्या पुरस्कारा खातीर वळखले. आयज देशांत इलेक्ट्रॉनीक मळार उदरगत जाल्या. हाची सुरवात राजीव गांधी हांच्या काळांतूच जाल्ली. तांणीच देशांत म्हायती आनी तंत्रज्ञान क्रांती हाडिल्ली.
बुधवारी राजीव गांधी हांचे जयंती निमतान पणजे आयोजीत केल्ले कार्यावळींत पाटकार उलयताले. ह्या वेळार आमदार कार्लुस फेरेरा, आदले खासदार फ्रान्सीस सादीर्र्न आनी हेर पदाधिकारी हजर आशिल्ले.
राजीव गांधी हांकां देशांतल्या तरणाट्यांचें सामर्थ्य खबर आशिल्लें. ते स्वताय देशाच्या इतिहासांतले सगल्यात तरणाटे प्रधानमंत्री आशिल्ले. तांकां तरणाट्यांक सक्षम करून लोकशाय प्रक्रियेंत आसपाव करून घेवचें आशिल्लें. हे खातीर तांणी मतदानाचो अधिकार २१ वर्सां पिराये वेल्यान उणे करून १८ वर्सां केल्लीं. तांकां सत्तेचें विकेंद्रीकरण करप गरजेचें दिसलें. हे खातीर तांच्या कार्यकाळांत ७३ आनी ७४ वी घडणूक दुरुस्ती करून पंचायत, नगरपालिकांक चड अधिकार दिल्ल्याचें तांणी सांगलें.
आमदार फेरेरा हांणी राजीव गांधी हांचे सयत हेर कॉंग्रेस फुडार्यांक गोंयां विशीं आपुलकी आशिल्ल्याचें सांगलें. राजीव गांधी हांचो खरो इतिहास खबर आशिल्ल्या लोकांनी कॉंग्रेस पक्षा वांगडा रावप गरजेचें अशें तांणी म्हणलें. फ्रान्सीस सार्दिन हांकां राजीव गांधी हांकां लागूनच गोंयच्या लोकांक आमदार, खासदार, मंत्री जावपाची संद मेळिल्ल्याचें सांगलें. ना जाल्यार गोंय महाराष्ट्रांत विलीन जावन हांगा महाराष्ट्राचे एक वा दोन आमदार आसता अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
