भांगरभूंय | प्रतिनिधी
अॅड. रमाकांत खलप : म्हापश्यां कार्यालयांत ओंपलीं आर्गां
भांगरभूंय । प्रतिनिधी
म्हापशें : आदले प्रधानमंत्री राजीव गांधी हे नवभारताचे निर्मितीचे शिल्पकार आशिल्ले. ते पुरोगामी विचारसरणीचे आशिल्ले. जाती-धर्मांत फूट घालपाचो तांणी केन्नाच यत्न करूंक ना. मागास जातींतल्या लोकांचो उद्धार जावचो हे खातीर ते वावुरले. डिजिटल इंडियाचें सपन लेगीत तांचेच आशिल्लें, अशें आदले केंद्रीय मंत्री अॅड. रमाकांत खलप हांणी सांगलें.
म्हापश्यां काँग्रेसीच्या उत्तर गोंय जिल्हो कार्यालयांत आदले प्रधानमंत्री राजीव गांधी हांचे पुण्यतिथी निमतान तांकां आर्गां ओंपचे खातीर आयोजीत कार्यावळीत अॅड. खलप उलयताले. ह्या वेळार महिला प्रदेशाध्यक्ष डॉ. प्रतिक्षा खलप, ज्येश्ठ फुडारी विश्वास नागवेंकार, सरचिटणीस विजय भिके, जिल्होध्यक्ष विरेंद्र शिरोडकार, गटाध्यक्ष मिताली गडेकार, राजन घाटे, चंदन मांद्रेंकार, परेश पानकार आनी हेर पदाधिकारी हाजीर आसले.
अॅड. खलप हांणी सांगलें, देशा खातीर राजीव गांधी हांणी व्हड त्याग केला. भारत देश संवसारांत पयल्या नंबरा वयलो देश करचे खातीर सगळ्या भारतीयांनी हातांत हात घालून काम केली जाल्यार ती तांकां खरीं आर्गां थारतलीं.
विश्वास नागवेकार हांणी सांगलें, राजीव गांधी हे दूरदिश्टी आशिल्ले फुडारी आशिल्ले. इंटरनॅटाची संकल्पना तांणी रुजयली. महिला वर्ग राजकी मळार वावुरता तो तांकांच लागून. देशा खातीर त्याग करपाची संद तांकां मेळ्ळी. तांच्या वावराचो उगडास दरेकल्यान दवरचो. विजय भिके हांणी राजीव गांधी हांच्या वावराचो नियाळ घेतलो. विरेंद्र शिरोडकार हांणी येवकार दिलो जाल्यार डॉ. प्रतिक्षा खलप हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
