भांगरभूंय | प्रतिनिधी
नागेश महालक्ष्मी प्रासादीक समाजाचो अमृत महोत्सवी वर्स सुवाळो
भांगरभूंय । प्रतिनिधी
फोंडें: बांदोडें फोंडेंच्या नागेश महालक्ष्मी प्रासादीक समाजाच्या अमृत महोत्सवी वर्सां निमतान 10 आनी 11 सप्टेंबराक राजीव गांधी कला मंदिराच्या सभाघरांत खाशेले कार्यावळीचें आयोजन केलां. 10 सप्टेंबराक हिमाचल प्रदेशाचे राज्यपाल राजेंद्र आर्लेकार हांचे हस्तुकीं कार्यावळीचें उक्तावण जातलें, अशी म्हायती कार्याध्यक्ष तशेंच वीज मंत्री सुदिन ढवळीकार हांणी पत्रकार परिशदेंत दिली.
पत्रकार परिशदेंत ढवळीकार हांचे वांगडा अध्यक्ष अजीत केरकार, सचीव अरूण काळे, मनोज बांदोडकार, अशोक नायक आनी शंभुनाथ केरकार हाजीर आशिल्ले.
10 सप्टेंबराक जावपी उक्तावण सुवाळ्याक मानाचे सोयरी म्हूण अभिनेत्री मृणाल कुलकर्णी (मुंबय) हाजीर रावतली. तशेंच मधूलिंगनागेश राजेंद्र वडियार आनी नागेश संस्थानाचे अध्यक्ष दामोदर भाटकार हांची खाशेली हाजेरी आसतली.
ह्या सुवाळ्यांत मानेस्तां हस्तुकीं 20 कलाकारांचो सत्कार करतले. राती वेळार ‘इन द सेल ऑफ सर्व्हायवल’ (विघ्नहर्ता प्रतिश्ठान मुंबय) नाटकाचो प्रयोग सादर जातलो. 11 सप्टेंबराक सांजेच्या 6 वरांचेर जावपी कार्यावळींत मुख्यमंत्री डॉ. प्रमोद सावंत, कला आनी संस्कृती मंत्री गोविंद गावडे, गोमंत विद्या निकेतन मडगांवचे अध्यक्ष जनार्दन वेर्लेकार आनी महालक्ष्मी संस्थानाचे अध्यक्ष हर्षद कामत हाजीर रावतले. हे कार्यावळींत मानेस्तां हस्तुकीं वट्ट 57 कलाकारांचो भोवमान करतले. राती कडेन स्वर सत्तरी संस्था संगीत ‘रणदुंदुभी’ हें नाटक सादर करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
